“Intom tafuh dan, ħuti maħbubin: kull bniedem għandu jkun pront biex jisma’, dewwiem biex jitkellem u dewwiem għar-rabja, għax ir-rabja tal-bniedem ma tiksibx il-ġustizzja t’Alla. Għaldaqstant, neħħu kull ħmieġ morali u ħażen tant prevalenti, u bil-manswetudini ilqgħu l-kelma mħawla fikom, li kapaċi ssalva erwieħkom” (Ġakbu 1:19-21).
Tul għomri s’issa, kieku xi ħadd iħallasni mitt Ewro għal kull kelma simpatika u ħanina li għidt dwar nies oħra, filwaqt li jiġbor mingħandi l-istess ammont għal kull kelma antipatika u sovversiva li għidt dwar l-oħrajn, nispiċċa fqir jew sinjur?
Xebba darba marret fuq John Wesley, u qaltlu, “Naħseb fl-aħħar skoprejt x’inhu t-talent tiegħi.”
L-evanġelista qalilha, “Għidli.”
Wieġbet, “Li nċanfar lil kulħadd, bla ma noqgħod nomgħodha.”
Wesley ikkunsiljaha, “Ma jidhirlix li l-Mulej se jieħu għalih jekk iżżomm dat-talent moħbi f’maktur.”
Il-Malti jgħid, minn jgħid wisq ftit fih risq! Ma fihomx x’tammira nies li l-ħin kollu jtaqtqu. Jeħdulek il-batteżmu ta’ rasek, bħat-tqattir tal-ilma minn vit fis-silenzju tal-lejl.
Talba: "Missier, int kellimtna b'Ibnek, u wassaltilna l-kliem tal-ħajja eterna. Agħtina l-grazzja sabiex l-istess messaġġ ta' tama ngħadduh lil ħaddieħor. Agħtina d-dehen ukoll sabiex kull meta nkellmu lil xulxin dan iservi ta' ġid u għajnuna reċiproka. Ammen."
Comments