“Dan irrid infisser, l-aħwa: iż-żmien hu mqassar, sabiex għal li ġej dawk li għandhom in-nisa jgħixu bħallikieku m’għandhomx; dawk li jibku bħallikieku ma jibkux; dawk li jifirħu bħallikieku ma jifirħux; dawk li jixtru bħallikieku ma jippossedux; dawk li jużaw id-dinja bħallikieku ma jużawhiex għalkollox. Għax il-forma ta’ did-dinja preżenti qed tgħaddi ’l hemm” (1 Korintin 7:29-31).
Hemm is-saltna ta’ din l-art u s-saltna tas-sema. L-Imgħallem spjegalna illi s-segwaċi tiegħu, għalkemm jinsabu fid-dinja, ma jappartenux għad-dinja (Ġwanni 15:18-19). Aħna nies magħmulin mit-trab tal-art, iżda s-sejħa u d-destin tagħna mhumiex għal hawn. Is-saltna preżenti hi transitorja; is-saltna ta’ Kristu hi għal dejjem, għax “il-Mulej Alla jagħtih it-tron ta’ David missieru, u jsaltan għal dejjem fuq id-dar ta’ Ġakobb, u għal saltnatu ma jkunx hemm tmiem” (Luqa 1:32-33).
Mela jekk id-dinja preżenti ttellifna milli naraw u napprezzaw “id-dinja li ġejja,” inkunu tabilħaqq qed nagħmu lilna nfusna. Il-Puritani kienu stretti fit-trattamenti tagħhom mad-dinja. Il-ħajja preżenti stmawha bħala preparazzjoni għall-ħajja futura fl-eternità, u allura kellhom il-vista tagħhom iffokata fuq l-etern, biex fiż-żmien ħajjithom jgħixuha fil-massimu tagħha.
Arthur Dent, wieħed minnhom, fil-potenzjal tad-dinja preżenti għall-ħażen, iddeskriva d-dinja hekk, bil-ġibdiet u l-leblibiet tagħha: “Hi baħar ta’ ħġieġ, purċissjoni ta’ għaxqiet banali, teatru ta’ varjetà, labirint ta’ errur, dagħbien ta’ għali, maqjel ta’ ħmieġ, wied ta’ miżerja, stat ta’ ingann, gaġġa mimlija kokki, għorna ta’ skorpjuni, xagħri ta’ lpup, territorja ta’ orsijiet, belliegħa ta’ passjonijiet, kummiedja taparsi, ġenn detestabbli.”
Preferew il-grazzja qabel il-ġid, u d-dehen qabel id-dinja. B’atteġġjament bħal dan, ma ħallew xejn milli jfixkilhom mill-mogħdija evanġelika.
Talba: “Missierna smewwieti, għomorna bħal dell, bħal sahra billejl; malajr jgħaddi u ma ninstabux iktar. Biss int iddepożitajt fi qlubna l-ħsieb tal-eternità. Tħalliniex mela nintrabtu ma’ ħwejjeġ għaddiena, għax int għamiltna għalik innifsek u qalbna ma tistrieħx qabel ma tistrieħ fik. Nitolbuk dan fuq il-merti ta’ Ibnek waħdu.”
Comments