“Tfal, obdu lill-ġenituri tagħkom fis-Sid, għax dan hu sewwa. ‘Onora ’l missierek u ’l ommok’ – li hu l-ewwel kmandament b’wegħda – ‘sabiex jaħbatlek tajjeb u jtul għomrok fuq l-art.’ Missirijiet, teżasperawx it-tfal tagħkom; minflok, rabbuhom fid-dixxiplina u l-istruzzjoni tas-Sid” (Efesin 6:1-4).
Jekk il-ġenituri jridu jaraw lil uliedhom imbierka fil-knisja u fl-iskola, ħa joqogħdu b’seba’ għajnejn biex ma jagħtuhomx eżempji mħassra d-dar bi kwalunkwe komportament traskurat jew profan. Altrimenti, il-ġenituri jagħmlulhom aktar ħsara d-dar milli kemm il-pastor kif ukoll is-surmast jistgħu jagħmlulhom fl-isfera tagħhom. Għax l-eżempju korrott ta’ dawn jikkontradixxi u jinnega l-istruzzjoni tajba ta’ dawk. L-influwenza ħażina tal-ġenituri hi aktar perikoluża peress li huma armati min-natura biex jiġbdu l-affezzjonijiet ta’ wliedhom fuq in-naħa tagħhom.
L-għożża hi mandatorja, iżda l-fsied żejjed jista’ jkun detrimentali. It-tfal taħt is-saqaf tagħna qed ikunu trenjati għall-ħajja. Jekk inħajmuhom, inkunu qed noqtlulhom ir-ruħ filwaqt li nikkonċentraw l-isforzi tagħna fuq il-ġisem. L-istruzzjoni u t-twiddib huma essenzjali, u għandhom jingħataw regolarment u b’impenn. Kwalunkwe dixxiplina messha tingħta b’sens ta’ konsistenta kif ukoll kunsens bejn il-missier u l-omm. Jekk it-tfal jintelqu għal rashom, isiru kuntraljużi. Meta mbagħad tipprova tinklina r-rieda tagħhom lejn is-sewwa, b’xejn ma ċċaqlaqha mingħajr ma tkissirha. Mela “ttrenja tifel fit-triq li għandu jmur, u meta jikber ma jwarrabx minnha” (Proverbji 22:6).
Talba: “Fir-relazzjonijiet fil-familji tagħna, o Mulej, kemm neħtieġu l-preżenza tiegħek biex tfarraġna! Kemm neħtieġu l-għerf minn fuq biex nimplimentaw l-istruzzjonijiet tajba tiegħek. Tħalliniex nimpressjonaw ruħna bit-tagħlim mondan; iftħilna widnejna u qalbna għat-tagħlim tiegħek, permezz ta’ Ibnek. Ammen.”
Comments