“Imbierek ikun Alla u Missier Sidna Ġesù Kristu, li berikna b’kull barka spiritwali fl-imkejjen smewwitin fi Kristu. Għax għażilna fih qabel il-ħolqien tad-dinja ħalli nkunu qaddisin u bla difett f’għajnejh. Fl-imħabba ppredestinana għall-adozzjoni bħala wliedu permezz ta’ Ġesù Kristu għalih innifsu, skont l-intenzjoni tajba tal-volontà tiegħu – għat-tifħir tal-grazzja glorjuża tiegħu, li biha ffavoriena fil-Maħbub. Fih għandna l-fidwa permezz ta’ demmu, il-maħfra tad-dnubiet, skont l-għana tal-grazzja tiegħu li fawwar ġenerożament fuqna. B’kull għerf u fehma għarrfilna l-misterju tal-volontà tiegħu skont l-għoġba tiegħu, li intenzjona fi Kristu, għall-amministrazzjoni adatta għall-milja taż-żminijiet, ċoè, li jiġbor kollox flimkien fi Kristu, il-ħwejjeġ fis-smewwiet u l-ħwejjeġ fuq l-art; iva, fih. Fih konna magħmulin werrieta, billi konna ppredestinati skont il-pjan ta’ dak li jopera kollox f’konformità mal-għan tal-volontà tiegħu, ħalli aħna, li ttamajna l-ewwel fi Kristu, inkunu għat-tifħir tal-glorja tiegħu. Intom ukoll kontu inklużi fih, wara li smajtu l-kelma tal-verità, l-evanġelju tas-salvazzjoni tagħkom. Malli emmintuh kontu ssiġillati fih bl-Ispirtu s-Santu mwiegħed, li hu l-kapparra tal-wirt tagħna, sal-fidwa sħiħa tal-possediment t’Alla – għat-tifħir tal-glorja tiegħu” (Efesin 1:3-14).
Il-pożizzjoni tagħna l-fidili “fi Kristu” hija l-motiv ewlieni għall-imġiba tagħna. Billi ripetutament jingħad li aħna en Christō, irridu napprezzaw il-fatt li aħna l-imweldin mill-ġdid għandna relazzjoni ma’ Kristu bħalma t-tjur għandhom mal-ajru, li jerfagħhom u jagħmilhom kapaċi jtiru, jew bħalma l-ħut jgħixu fl-ilma baħar. It-tjur għandhom l-arja fihom u huma jinsabu fl-arja: hekk il-fidili, Kristu jinsab fina u aħna fih. Sar l-element tagħna, jiċċirkondana u jippervadina vitalment. Fih ngħixu, u aħna mħarrkin, u għandna l-eżistenza tagħna. Hu fina, u aħna fih. Mingħajru ma nistgħu nagħmlu xejn, u m’aħna xejn. Enfatikament hu kollox f’kollox għalina. L-unjoni tagħna ma’ Kristu hi s-sors ta’ kull barka.
Ladarba dan hu minnu, insibu eżortazzjoni potenti (Efesin 4:1-6) bħal meta band’ oħra l-istess appostlu jappellalna, f’ġieh il-ħniniet t’Alla, biex nippreżentaw lilna nfusna bħala sagrifiċċju ħaj, u biex ma nikkonformawx irwieħna mal-mentalità tad-dinja, imma nkunu trasfigurati bit-tiġdid ta’ moħħna (Rumani 12:1-3).
Talba: “Missier, int tajtna t-tagħrif tal-verità; qanqaltna biex nirrikorru għand Ibnek ħalli bih insibu aċċettazzjoni quddiemek. Issa nagħrfu illi bħala l-imgħammdin fih konna wkoll mgħammdin f’mewtu. Konna midfunin miegħu permezz tal-magħmudija fil-mewt. Agħtina grazzja, mela, sabiex bħalma Sidna kien irxoxtat mill-imwiet permezz tal-glorja tiegħek, aħna nimxu fit-tiġdid tal-ħajja.”
Comments