“‘Ħa jkollkom fidi f’Alla,’ weġibhom Ġesù. ‘Tassew ngħidilkom, kull min jgħid lil dil-muntanja, “Inqala’ u nxteħet fil-baħar,” u ma jiddubitax f’qalbu, iżda jemmen illi dak li jgħid se jiġri, ikunlu hekk. Minħabba f’hekk ngħidilkom, kull ħaġa kwalunkwe li għaliha titolbu u tissupplikaw, emmnu illi rċivejtuha, u tkunilkom. U kull meta toqogħdu bilwieqfa biex titolbu, aħfru, jekk għandkom xi ħaġa kontra xi ħadd, sabiex Missierkom fis-smewwiet ukoll jaħfrilkom l-offiżi tagħkom’” (Mark 11:22-25).
Missierna ngaġġa ruħu illi jwieġeb għat-talb tal-fidili u “jwettaq ix-xewqat ta’ dawk li jibżgħu minnu.” Iżda kultant hemm vjaġġ twil qabel ma l-kredenti jara l-bastiment jirritorna mill-avventura tiegħu. Hemm intervent ta’ xitwa qalila bejn iż-żrigħ tat-talb, u l-ħsad tiegħu. Alla tabilħaqq jismagħna malli nitolbu, iżda spiss ma nisimgħux mingħandu daqstant malajr.
Bħala evidenza niċċitaw il-każ tal-profeta. Darba minnhom intbagħtitlu dit-tagħrifa: “La tibżax, Danjel, għax mill-ewwel jum li daħħalt f’qalbek li tifhem, u tumilja ruħek quddiem Alla tiegħek, kliemek kien mismugħ, u jien ġejt għal kliemek. Izda l-kap tas-saltna tal-Persja waqqafni għal għoxrin jum…” (Danjel 10:13). It-talbiet jaslu dlonk fis-sema, iżda t-tweġiba minn hemm tista’ tiddawwar ma tasal. Dan inkwantu t-talb tal-fidili.
Xi ngħidu mbagħad għat-talb tal-miskredenti? Id-doveri huma doveri għal kulħadd, bħalma bil-kmandamenti Alla jobbliga lil kulħadd, bħala ħlejjaq tiegħu, biex iħarsuhom. Għalkemm l-infidil jidneb fit-talb, frattant mhux dnub għalih illi jitlob. Hemm dnub fil-manjiera tat-talb tiegħu, peress li jitlob bla fidi u b’motivi żmerċi. Iżda t-talb, inkwantu l-att u s-sustanza tiegħu, hu dmiru. Jidneb, mhux għax jitlob, għax dan hu rikjest minnu; jidneb għax jitlob ħażin, ċoè, mingħajr indiema u sikwit b’finijiet egoistiċi jew ulterjuri. Fit-talb tal-miskredent jidhru l-abominazzjonijiet, imma l-fatt li jitlob mhu xejn abominazzjoni. Hi r-rieda tajba u aċċettabbli t’Alla, xi ħaġa kmandata minnu.
Talba: “Grazzi, Mulej Alla, talli wassaltni fi stadju illi napprezza li qabel ma ngħix għalik, jeħtieġ illi nkun tiegħek. Int għamiltni tiegħek billi xtrajtni minn taħt il-madmad tad-dnub u t-tirannija tax-xitan. Fdejtni u tajtni aċċess fil-preżenza tiegħek, b’Ġesù Ibnek. Agħtini l-għerf u x-xenqa biex nersaq lejk bit-tħannin tiegħi, bil-konfidenza, għax naf li widnejk huma miftuħa għall-għajta ta’ wliedek.”
Comments