“Għax jekk demm il-bdabat u l-barrin u l-rmied t’erħa li jraxxax lil dawk imniġġsin ċeremonjalment, iqaddes għall-purità esterna, kemm iżjed id-demm ta’ Kristu, li permezz tal-Ispirtu etern offra lilu nnifsu bla difett ’l Alla, jippurifika l-kuxjenza tagħna minn atti mejtin ħalli naqdu ’l Alla l-ħaj! Minħabba f’hekk Kristu hu l-medjatur ta’ patt ġdid, ħalli l-imsejħin jirċievu l-wirt etern imwiegħed – peress li ġrat il-mewt għall-fidwa mit-trasgressjonijiet kommessi taħt l-ewwel patt” (Ebrej 9:13-15).
L-għemejjel kollha tagħna qabel ma ndimna kienu għemejjel mejta, bla ġmiel veru fihom. Jistgħu jimpressjonaw lis-soċjetà, iżda impossibbli jkunu aċċettabbli quddiem Alla. Fl-għajn naturali jirbħu anke krettu, iżda Alla ma jixxaħħamx bl-għotjiet esterni meta l-qalb għadha avversiva lejh. Agħti l-karità tiegħek lill-foqra, il-parir tiegħek lis-sempliċi, wirtek lil uliedek, il-ħaraġ lil Ċesri, iżda qalbek lil Alla. Jekk għadek ma tajthilux, tippretendi li se jilqa’ s-sagrifiċċju miżeru tiegħek?
Ġisem mejjet jista’ jkollu l-fattizzi u s-sbuħija bħal ġisem ħaj, imma xorta waħda tibqa’ s-sbuħija ta’ katavru. Ladarba l-bniedem hu spiritwalment mejjet mingħajr Kristu, ma jistax joffri servizz ħaj. Mewt naturali tinkapaċitana minn azzjonijiet naturali; mewt spiritwali tinkapaċitana minn azzjonijiet spiritwali.
Għal dawk fl-għaqda ma’ Ġesù, li mietu miegħu u rxoxtaw miegħu għat-tiġdid ta’ ħajjithom, l-opri huma importantissmi, għax fidi għarwiena mhi fidi xejn. Ir-reliġjon tagħna nistgħu nirreduċuha mhux biss għal x’nemmu, il-credenda, iżda wkoll x’nagħmlu, l-agenda. Frattant ma jistax ikun hemm frott qabel ma jkun hemm siġra; ma jistax ikun hemm tajjeb qabel ma l-persuna tkun l-ewwel ġusta u tajba.
Talba: “O Missier smewwieti, int għoġbok tiġġustifikana bil-grazzja tiegħek sabiex insiru werrieta skont it-tama tal-ħajja eterna. Fakkarna kontinwament il-pożizzjoni tagħna quddiemek, sabiex, mimlijin b’qima u radd il-ħajr, nieħdu ħsieb ningaġġaw fl-opri t-tajba, tant siewja għall-proxxmu u ta’ sebħ u glorja għalik.”
Comments