“Imma Alla jesibixxi l-imħabba tiegħu nnifsu lejna, billi filwaqt li konna għadna midinbin, Kristu miet għalina. Mela, billi issa ninsabu ġustifikati b’demmu, bil-wisq iżjed se nkunu salvati mir-rabja t’Alla permezz tiegħu! Għax jekk, filwaqt li konna għadna għedewwa, konna rrikonċiljati m’Alla permezz tal-mewt t’Ibnu, bil-wisq iżjed, billi issa ninsabu rrikonċiljati, se nkunu salvati b’ħajtu! Mhux hekk biss, iżda wkoll neżultaw f’Alla permezz ta’ Sidna Ġesù Kristu, li permezz tiegħu issa rċevejna r-rikonċiljazzjoni” (Rumani 5:8-11).
Irrifletti tikka: għalfejn nilmentaw bil-gwaj u s-saram li jibblokkaw triqatna? Mhux is-saram li jisromna, iżda l-iskuntentizza. Sakemm għadna nipprovaw insibu twettiq għalina nfusna f’oġġetti terrestri, ma nistgħux nithennew b’Alla. Inkunu qed inwarrbu d-Donatur biex nikkonċentraw fuq id-doni tiegħu. Inkunu qed inġibu ruħna bħal dik l-għarusa li meta l-maħbub tagħha rregalalha ċurkett tad-djamanti, tant iffissat fuqu illi nsiet lill-maħbub. Kemm għandna ħabta nkunu mogħmija biċ-ċrieket bla ma nirrealizzaw li dawn huma biss daqstant espressjonijiet tanġibbli ta’ mħabba minn fuq.
Ladarba l-Missier tana lil Ibnu, iħobbna; allura bihom jew mingħajrhom xorta waħda jħobbna. Meta nirċevuhom, ħa jfakkruna fih u fil-ġenerożità tiegħu; meta nibqgħu mingħajrhom, ħa nistabru u nżommu fil-menti tagħna illi dawn mhumiex prova infallibbli ta’ mħabbtu lejna. Il-prova dejjiema u superba ngħatat fuq il-Kalvarju.
Raġunament differenti jdewwed fina l-iskuntentizza. Mhux l-ilma barra mill-bastiment, iżda l-ilma li jidħol mix-xquq tal-bastiment, illi jgħerrquh. Mhix l-afflizzjoni esterna li jmissha tagħmel ħajjet il-Kristjan imnikkta. Moħħ kuntent jagħraf ibaħħar bil-qlugħ ’il fuq mill-ilmijiet; iżda meta titfaċċa toqba ta’ skuntentizza, u l-gwaj jinvadi l-qalb, il-povra qalb tinkwieta u tiffonda. Agħmel, mela, bħall-baħħara: ippompja l-ilma ’l barra u qalfat ix-xquq f’ruħek. Hekk ebda sfrattu jew ingropp ma jkiddek.
Talba: “X’wirja fenomenali ta’ mħabbtek frixt quddiemna, Missier! U frattant indendlu l-geddum. X’esibizzjoni ta’ ħniena stedintna għaliha fuq il-Kalvarju! U frattant niddubitaw mogħdijietek magħna. X’lussu ta’ fedeltà turi magħna minn ġurnata għall-oħra, minn ġimgħa għall-oħra! U frattant ingergru u nbarqmu. Aħfrilna, Mulej! Nammettu li għad għandna fehma fjakka tal-patt sinjur illi int stabbilejt magħna, f’Ibnek Ġesù. Aħfrilna, u iftħilna għajnejna biex ingawdu r-rikkezzi insondabbli miġbura fi Kristu. Ammen.”
Comments