“Il-qaddej tas-Sid ma jmissux jitlewwem, iżda aktarx ikun ġentili ma’ kulħadd, kapaċi jgħallem, sieber. Għandu jikkoreġi bil-manswetudini ’l dawk li jopponuh, abbli Alla jagħtihom l-indiema biex jaslu għat-tagħrif tal-verità, u jistejqru lura f’sensihom u jaħarbu min-nassa tax-xitan, wara li nqabdu minnu ħalli jagħmlu l-volontà tiegħu” (2 Timotju 2:24-26).
Ma jistax ikun tistmah bħala ħabib dak il-bniedem illi jaf li qed isir komplott minn wara dahrek biex jisirquk jew jaħarqulek darek jew se jaħbtu għalik jew għal xi qarib għażiż tiegħek, u dan jibqa’ b’fommu sieket, mingħajr ma jgħarrfek minn rajh, u b’sens ta’ urġenza.
Issa l-Kristjan jaf li m’hemm ebda qattiel, ħalliel jew brigant agħar mid-dnub. F’każ bħal dan, is-skiet jew il-ħabi hu ekwivalenti għal tradiment. Kull min jibqa’ riżervat, jew jinħeba wara subgħajh, jippretendi li jħobbok, mentri fil-fatt, ma jaħmlikx u ma jimportahx minnek. “La tobgħodx lil ħuk f’qalbek, iżda widdeb lil għajrek, u la titgħabbiex bid-dnub minħabba fih.”
Mill-banda l-oħra, tgħodd bħala veru ħabib fidil, u denju ta’ kull stima u affezzjoni, dak li jittratta dirett u bla telf ta’ żmien b’referenza għal xi dnub fik.
Forsi tipprotesta, “Min jibqa’ sieket jadotta dit-tattika biex ma jinkwetanix.” Imma għal darb’ oħra, nisħaq, kemm hu tabib iblah, u ħabib nominali, illi jħallik tmut għax jibża’ illi jekk jinformak bil-marda serjissma jtelliflek it-trankwillità meta jkun għad fadal ċans ta’ intervent kirurġiku.
Bl-istess mod inkunu qed inġibu ruħna b’kattiverija jekk, biex ningwalawha ma’ ħbiebna u ma ninkwetawhomx, iħalluhom jiżżerżqu fit-triq tar-rovina. Veru, mhuwiex ħaġa faċli tikkonfronta lil sieħbek bi dnubu; fina għandna l-istess atteġġjament ta’ Kajjin illi, meta l-Mulej staqsieh fejn hu ħuh Abel, farfar u qallu li ma jħossux obbligat joqgħod għassa tiegħu. Ewwilla tippreferi tħalli lil sieħbek jispiċċa fil-kastig etern biex ma tirrabjahx jew ma tiskurmentahx, jew biex ma tipperikolax ir-reputazzjoni tiegħek miegħu?
“Missierna smewwieti, sawwar minna nies li jimportana minn ħaddieħor, mhux biex nindaħlu fejn ma jesagħniex, iżda biex bħalma ħaddieħor wasslilna l-aħbar ta’ salvazzjoni f’Ibnek Ġesù, aħna ngħadduha lil dawk l-erwieħ li għadu jgħammru fil-wied ta’ dell il-mewt. Agħtina l-kumpassjoni u sens ta’ urġenza biex nirbħuhom għall-Feddej uniku, appuntat minnek stess, Ġesù Ibnek.”
Comments