Skip to main content

Sultan Fuq l-Art Kollha

“U jiġri dakinhar illi ma jkunx hemm dawl; id-dawwaliet inaqqsu d-dawl tagħhom. Għax ikun jum uniku, magħruf mill-Mulej, li ma jkun la nhar u lanqas lejl, iżda flgħaxija jkun id-dawl. F’dak il-jum joħroġ ilma ġieri minn Ġerusalemm; nofsu lejn il-baħar tal-Lvant, u n-nofs l-ieħor lejn il-baħar tal-Punent; jiġri fis-sajf u fix-xitwa. U l-Mulej ikun sultan fuq l-art kollha: f’dak il-jum il-Mulej ikun l-uniku, u uniku jkun ismu” (Żakkarija 14:6-9).

Xi prospett imbierek! Din mhix ħolma ta’ xi wieħed fanatiku, iżda d-dikjarazzjoni tal-Kelma infallibbli. Il-Mulej ikun magħruf fost il-popli kollha, u l-gvern grazzjuż tiegħu jkun rikonoxxut minn kull tribù tal-bniedem. Hawn tingħatalna togħma tal-barkiet li għad jissawbu fuq l-art permezz tal-knisja u x-xandir fidil tal-evanġelju. L-ilma ġieri hu simboliku tal-barka divina li għad trid tilħaq id-dinja. 

Illum mhux hekk. Ftit huma dawk li jmilu quddiem is-Sultan il-Kbir. Illum ir-ribelljoni hi mirfuxa mal-erbat irjieħ; kulħadd għandu l-allat tiegħu. Anke fost dawk imsejħa Kristjani hemm diversità kbira ta’ ideat dwaru u dwar l-evanġelju tiegħu! Iżda għad jasal il-jum meta jkun hemm Sultan wieħed, Mulej wieħed, u isem wieħed għal Alla l-ħaj. O Mulej, għaġġel biex dan iseħħ! Kuljum ngħajtu, “Tiġi saltnatek.” 

Daqskemm ċertament tkellem l-Ispirtu s-Santu bil-profeti, daqshekk ieħor ċerti li xi darba l-art għad tkun mimlija bil-glorja tal-Mulej. L-awtorità leċita tas-Sid Ġesù għad tkun rikonoxxuta. S’issa l-bnedmin irribellaw kontra Alla l-ħaj, u qdew diversi leblibiet, xewqat u frugħat; għamlu għalihom infushom diversi allat. Iżda għad jistqarru lill-Ħakkiem leġittmu tagħhom, u lkoll jikkunfessaw l-istess Alla, il-Ħallieq tagħhom. 

Ġesù Kristu ma mietx għalxejn. L-għanijiet eterni tal-Missier mhux se jkunu frustrati. Hawnhekk, fejn Satana ttrijonfa, Ġesù Kristu għad ikun inkurunat, u l-Mulej Alla, l-Omnipotenti, għad jirrenja. Ejjew immorru fuq xogħolna u t-taqbid tagħna, magħmulin qawwija fil-fidi. Ma jaqbilx, quddiem dil-profezija meraviljuża, illi nintimidaw ruħna u nċedu għat-theddid tal-għadu. Finalment il-vittorja hi tal-Feddej li qam mill-qabar. 

Talba: “Xennaqna aktar u aktar bit-tama, Missier Alla tas-sema, għax nafu li t-tama mħawla fina ma tistax tkiddna jew tiddiżappuntana, għax hi marbuta sfiq mal-wegħda infallibbli tiegħek. Tifħir u glorja lilek, Sultan tan-ġnus. O li naraw dak iż-żmien meta truf l-art jiftakru u jerġgħu lura għandek, u l-familji kollha tal-ġnus iqimu quddiemek. Ammen.”

Comments

Popular posts from this blog

Id-Drawwa

“Ġesù rritorna fis-setgħa tal-Ispirtu fil-Galilija, u r-rapport dwaru infirex mal-inħawi kollha. Hu għallem fis-sinagogi tagħhom, imfaħħar minn kulħadd. Mar f’Nażaret, fejn trabba, u skont id-drawwa tiegħu mar fis-sinagoga f’jum is-Sibt. U qam biex jaqra Tnewwillu l-iskroll tal-profeta Isaija. Fetaħ l-iskroll u sab il-post fejn kien hemm miktub: ‘L-Ispirtu tas-Sid fuqi għax unzjonani ħalli nxandar l-evanġelju lill-foqra. Bagħatni nipproklama l-liberazzjoni lill-ikkaptivati, u dawl mill-ġdid lill-għomja, nibgħat illiberati lill-oppressati, nipproklama s-sena favorevoli tas-Sid.’ Imbagħad gerbeb l-iskroll, raddu lill-attendent u ntnasab bilqiegħda. Għajnejn kulħadd fis-sinagoga kienu ssommati fuqu, u beda billi qalilhom, “Illum twettqet din l-Iskrittura li għadkom kemm smajtu’” (Luqa 4:14-21).  Hu sinifikanti ħafna kif hawn jingħad illi Ġesù attenda l-qima fis-sinagoga “skont id-drawwa tiegħu.”  Id-drawwa, imħaddma tajjeb u bil-għaqal, fiha valur imprezzabbli. Issirilna t-tien

Qawwija fid-Dgħufija

“U mqar jekk l-evanġelju tagħna hu mgħotti, hu mgħotti biss għal dawk li qed jintilfu. Fil-każ tagħhom l-alla ta’ daż-żmien għema mħuħ il-miskredenti, sabiex ma jiddix fuqhom it-tidwil tal-evanġelju tal-glorja ta’ Kristu, li hu l-immaġni t’Alla. Għax mhux lilna nfusna nippritkaw, iżda ’l Kristu Ġesù bħala s-Sid, u aħna nfusna l-qaddejja tagħkom minħabba Ġesù. Għax Alla, li qal, ‘Ħa jiddi d-dawl mid-dlam,’ huwa dak li idda fi qlubna għat-tidwil tat-tagħrif tal-glorja t’Alla f’wiċċ Kristu. Imma għandna dat-teżor f’reċipjenti xaqqufin sabiex jintwera li din l-eċċessività tas-setgħa tappartieni għal Alla u mhijiex minna nfusna” (2 Korintin 4:3-7). Hemm kontinwità fil-fidi: ninsabu f’suċċessjoni ta’ demm martri. Ħa ngħaddu t-torċa minn id għall-oħra, minn ġenerazzjoni għall-oħra. Apparti l-fidili fil-knisja stabbilita, insibu n-Novatjani, id-Donatisti, il-Valdiżi (seklu 12), l-Albiġiżi (seklu 13), il-Lollardi (wara Wiklef fis-seklu erbatax), l-Aħwa Boħemjani (seklu 15), u l-Anabattis

Rebbieħa Ma' Kristu

“Madankollu għandi naqra ħwejjeġ kontra tiegħek: għandek hemmhekk nies li jżommu mat-tagħlim ta’ Balgħam, li għallem lil Balak biex jitfa’ ostaklu quddiem ulied Iżrael, ħalli jieklu ikel sagrifikat lill-idoli, u jiffornikaw. Hekk int għandek ukoll lil dawk li bl-istess mod iżommu mat-tagħlim tan-Nikolajtin. Indem mela! Altrimenti se niġi għandek malajr u nikkumbatti kontrihom bix-xabla ta’ fommi. Min għandu widna, ħa jisma’ x’jgħid l-Ispirtu lill-knejjes. Lil min ivinċi nagħtih mill-manna l-moħbija. Nagħtih ukoll ġebla bajda, u fuq il-ġebla isem ġdid miktub li ħadd ma jafu ħlief min jirċeviha” (Rivelazzjoni 2:14-17). Qalb tiegħi, tqanqal biex tippersevera fit-taqbida qaddisa, għax il-premju tar-rebħa hu kbir. Illum nieklu mill-ikel smewwieti li jaqa’ madwar il-kampijiet tagħna, l-ikel li dejjem imantni ’ll-pellegrini fi triqthom lejn il-Kangħan. Iżda hemm merfugħ għalina fi Kristu Ġesù ikel spiritwali wisq ogħla, ikel li għalissa għadu moħbi mill-esperjenza tagħna. Fil-ġarra deh