“Il-presbiteru lis-sinjura l-magħżula u lit-tfal tagħha, li jien inħobb fil-verità – u mhux jien biss, iżda wkoll dawk kollha li għarfu l-verità – minħabba l-verità li tgħammar fina u se tkun magħna għal dejjem: il-grazzja, il-ħniena u s-sliem ikunu magħna, mingħand Alla l-Missier u mingħand Ġesù Kristu, Iben il-Missier, fil-verità u l-imħabba” (2 Ġwanni 1-3).
Alla Trinità hu l-funtana perenni tas-sliem:
Il-Missier: “Issa Alla tas-sliem, li b’demm il-patt etern ġab lura mill-imwiet lil Sidna Ġesù, ir-Ragħaj il-kbir tan-nagħaġ, ifornikom b’kull ħaġa tajba ħalli tagħmlu l-volontà tiegħu, u jaħdem fina dak li jogħġob f’għajnejh, permezz ta’ Ġesù Kristu, li lilu tkun il-glorja għal dejjem ta’ dejjem. Ammen” (Ebrej 13:19-20).
L-Iben: “Għax tweldilna tifel; ingħatalna iben. U s-setgħa tkun fuq spallejh, u jissemma ismu Kunsilier tal-għaġeb, Alla qawwi, Missier għal dejjem, il-Prinċep tas-sliem” (Isaija 9:6).
L-Ispirtu s-Santu: “Jien mela, il-priġunier għas-Sid, neżortakom ħalli timxu denjament tas-sejħa li biha kontu msejħin, b’kull umiltà u manswetudini, bil-paċenzja, tissaportu ’l xulxin fl-imħabba, tħabirku ħalli tippriżervaw l-unità tal-Ispirtu fir-rabta tas-sliem” (Efesin 4:1-3).
Is-sliem hu l-imħabba tirpoża. Hu l-imħabba fil-mergħat iħaddru; hu l-imħabba ħdejn l-ilmijiet serrieħa. Hu dik il-kalmezza li ddewwi l-kuxjenza meta tara r-riparazzjoni ta’ Kristu suffiċjenti, u s-Salvatur dispost tajjeb lejna. Hu r-ruħ li Kristu rrikonċilja, mifruxa fis-serenità u fidi sempliċi, u l-Mulej Alla, ħanin u grazzjuż, jitbissem fuqha.
Ladarba ġejna introdotti f’patt m’Alla ħaj u veru, is-sliem hu wirtna. “Inħallilkom is-sliem,” jgħarrafna Sidna Ġesù, “nagħtikom is-sliem tiegħi. Mhux bħalma tagħti d-dinja nagħtikom jien. Tħallux qalbkom tkun iddisturbata, lanqas beżgħana” (Ġwanni 14:27). Imbagħad, meta aħna l-fidili mmutu, “nidħlu fis-sliem,” iżda waqt li għadna ħajjin, is-sliem jidħol fina, għalkemm mhux perfettament, għax il-programm divin għas-salvazzjoni ħolistika tagħna jieħu fit-tul, avolja qatt mhu fid-dubju.
Petrarka qal: “Fina jabitaw ħames għedewwa kbar għall-paċi. Dawn huma: ir-rgħiba, l-ambizzjoni, il-ġelożija, il-korla u l-kburija. Malli nitturufnaw dawn l-avversarji tagħna, infallibbilment ingawdu sliem perpetwu.”
Appuntu, il-Kristjan iddikjara gwerra kontra kull manifestazzjoni midinba. Il-gwerra għadha għaddejja, għalkemm hu diġà ddikjarat “aktar minn konkwistatur.” Mela dawk li jfettlilhom jitmasħru bl-evanġelju u b’dawk li jħaddnuh, m’għandhomx għalfejn jidħqu meta jaraw lil ulied Alla mħabbtin u minn xi daqqiet mikdudin ukoll.
Fl-iskola ta’ Ġesù nitgħallmu, imma mhux istantanjament. Is-sliem diġà depożitat fina, imma għadna ma drajniex nisfruttawh għall-konsolazzjoni tagħna. Biss ħaġa waħda ċerta: aktar ma nimxu pass pass ma’ Sidna, is-sliem joktor fina. “Inti żżommu fi sliem perfett lil min moħħu jistrieħ fik, għax jafda fik” (Isaija 26:3). Tħarsux, mela, kif jibda l-Kristjan, iżda kif jispiċċa.
Mill-banda l-oħra, is-sliem tal-infidili mhux talli hu fażull, iżda qed jiżloqilhom mument b’mument, u għad jitlaqhom bla tama tal-iċken faraġ. “‘M’hemmx sliem,’ jgħid il-Mulej, ‘għall-ħżiena’” (Isaija 48:22).
Talba: “O Alla Trinità, għoġbok iddaħħalna f’patt tas-sliem miegħek. Grazzi talli ħadt l-inizjattiva favur tagħna biex issa li emminna l-bxara t-tajba mwassla lilna, miegħek ingawdu s-sliem. Bħala wliedek agħmilna dejjem fiduċjużi fik u ubbidjenti lejk biex qlubna u mħuħna jkunu mħarsin wkoll bis-sliem tiegħek li jissupera kull komprensjoni. Ammen.”
Comments