“Issa nafu illi kulma tgħid il-liġi, tgħidu ’l dawk taħt il-liġi, sabiex kull fomm jintebaq u d-dinja kollha tinżamm responsabbli quddiem Alla. Għalhekk mill-opri tal-liġi ebda bniedem mhu se jkun iddikjarat ġust quddiemu; aktarx, permezz tal-liġi jiġina t-tagħrif tad-dnub. Imma issa, apparti l-liġi, il-ġustizzja t’Alla hi mmanifestata, mixhuda mil-Liġi u l-Profeti, iva, il-ġustizzja t’Alla permezz tal-fidi f’Ġesù Kristu għal dawk kollha li jemmnu. M’hemmx distinzjoni, għax kollha dinbu u jonqsu mill-glorja t’Alla, u huma ġġustifikati b’xejn bil-grazzja tiegħu permezz tal-fidwa li seħħet fi Kristu Ġesù” (Rumani 3:19-24).
Il-perfezzjoni kif jifhimha l-bniedem u l-perfezzjoni kif jaraha Alla huma differenti minn xulxin. Ħa jiftakru l-moralisti min huma, u kemm huma fjakki t-tentattivi tagħhom biex jilħqu l-perfezzjoni li Alla jirrikjiedi minnhom.
Ewwilla nsew li huma nisel Adam? Ewwilla ma jridux ikunu realistiċi u jagħrfu li fil-vini tagħhom hemm jiġri demm it-traditur? Ladarba kull fomm għad jintebaq, kif jissograw jiftħu tagħhom? Jekk difatti d-dinja kollha għad tidher ħatja quddiem l-Imħallef etern – għax bl-opri tal-liġi ebda bniedem ma jista’ jkun magħdud ġust quddiemu – kif għandhom l-ardir jipprovaw jiddefendu lilhom infushom? Kif jissograw jgħidu li huma innoċenti quddiem l-Ogħla? Jaqaw ma jirrealizzawx illi l-ħarsa tal-Omnixjenti tippenetra sa fil-moħbiet tal-qalb? Ewwilla ma jafux illi Alla jinnota l-korruzzjoni avolja l-mixja tagħhom tidher ċivili?
Qatt ma semgħu l-moralisti illi hu biss Kristu li jippurifikalna qlubna permezz tal-fidi fih, kif ukoll iqaddisna bil-fidi? (Atti 15:9; 26:18). Mingħajr il-maħfra tiegħu, il-wiċċ maħsul u l-idejn nodfa tagħhom qatt ma jistgħu jirrikmandawhom quddiem Alla, li jismu Qaddis.
Ironikament, it-tjieba tal-moralisti aktar tagħmel ġid lil nies oħra f’did-dinja milli lilhom infushom fid-dinja l-oħra. Iċ-ċiviltà, l-edukazzjoni, l-imġiba diċenti, l-etikett, hi bastun tajjeb biex timxi bih fost il-bnedmin, imma hi sellum żgangat u diżappuntanti biex titla’ l-Ġenna biha. Das-sellum ma jlaħħaqx. Ġesù Kristu biss – it-taraġ li fuqu jitilgħu u jinżlu l-anġli t’Alla – iġonġi l-art mas-sema.
L-arċier jista’ jimmissja l-bersall tiegħu billi jispara żmerċ jew inkella ma jisparax qawwi biżżejjed. L-ipokritu jispara żmerċ, mentri l-moralista ma jwassalx il-vleġġa tiegħu sal-bersall. Iż-żagħżugħ li staqsa lis-Sid Ġesù, “X’għandi nagħmel biex niret il-ħajja eterna?” seta’ jkun bniedem aħjar kieku ma kienx daqshekk tajjeb!
Talba: “Int għadabt, Mulej Alla, għax aħna dnibna; domna ħafna fi ħtijietna. Insalvaw aħna? Għax sirna lkoll bħal raġel imniġġes, u s-sewwa kollu tagħna sar bħal ċarruta maħmuġa; ilkoll nidbielu bħal werqa, u ħtijietna, bħar-riħ, iġorruna. Għax m’hawn ħadd iżjed li jsejjaħ ismek, li jitħarrek biex iżomm miegħek. Tkomplix taħbi wiċċek minna; tħalliniex nintemmu fi ħżunitna. Ħenn għall-qaddejja tiegħek! Ħa jiddi dawlek fuqna! Nappellawlek f’isem Ibnek Ġesù. Ammen.”
Comments