“Il-Mulej ħanin u twajjeb, u bil-mod biex jagħdab u ta’ tjieba kbira. Mhux dejjem jitlewwem magħna, u lanqas jitgħaddab għal dejjem. Ma mexiex magħna skont dnubietna, u lanqas ħallasna skont ħżunitna. Għax daqskemm is-smewwiet huma ’l fuq mill-art, daqshekk hi kbira t-tjieba tiegħu għal dawk li jibżgħu minnu” (Salmi 103:8-11).
Din hi dikjarazzjoni meraviljuża, u nistgħu nifhmuha; imissha timlina b’rikonoxximent. Kif jista’ jkun, Alla jibqa’ lura milli jroddilna skont dnubietna? Għas-sempliċi raġuni li lil Ibnu raddlu skont dnubietna. “Lil dak li ma kienx jaf dnub Alla għamlu dnub għalina, sabiex aħna nsiru l-ġustizzja t’Alla fih” (2 Korintin 5:21).
It-toqol tal-ħtija għaffiġna, u s-sentenza tal-mewt kienet imdendla fuqna; iżda t-toqol għaddieh għal fuq Ibnu, u bata l-konsegwenzi hu għan-nom tagħna. Is-sentenza tal-mewt, indirizzata lilna, kienet esegwita fuqu. Alla darbu fl-għadab feroċi tiegħu, għax l-għadab li kien fuq rasna tefgħu fuq ir-ras qaddisa t’Ibnu. “Il-kastig, li bih għandna s-sliem, kien fuqu, u bil-flaġellazzjoni tiegħu aħna fiqna.”
Hawn hu l-iskambju li bih ksibna titlu ġdid quddiem l-Imħallef tas-sema u l-art. “Kristu fdiena mis-saħta tal-liġi billi sar saħta għalina, għax hu miktub: ‘Misħut kull min hu mdendel ma’ siġra,’ sabiex f’Ġesù Kristu l-barka t’Abraħam tiġi għand il-Ġentili, sabiex nirċievu l-Ispirtu mwiegħed permezz tal-fidi” (Galatin 3:13-14). Is-saħta ħadha s-Sostitut tagħna biex mingħandu nirċievu l-barka. Alla jgħoddna ġusti fuq il-merti tiegħu.
Allura flok ikkundannati, issa ġustifikati; flok ħatja, issa maħfura; flok imniġġsa, issa nodfa; flok midinbin, issa qaddisin.
Talba: “O Alla grazzjuż, int ġust wisq biex tivvindika l-ġustizzja tiegħek darbtejn għall-istess difetti. U allura, ladarba dderiġejt l-għadab qalil tiegħek fuq is-Sostitut tagħna, m’intix se ddawru xi darba għal fuqna wkoll. Issa li raddejtlu skont l-inikwità tagħna, tippremjana skont il-merti tiegħu! Minħabba f’hekk noffrulek it-tifħir u r-radd il-ħajr tagħna. Ammen.”
Comments