“Huma u sejrin fi triqthom, Ġesù daħal f’raħal fejn mara jisimha Marta laqgħetu f’darha. Kellha oħtha jisimha Marija, li niżlet bilqiegħda ma’ saqajn is-Sid, tisma’ kelmtu. Imma Marta kienet distratta b’xebgħa faċendi. Ġiet fuqu u qalet, ‘Ja Sid, ma jimportakx illi oħti ħallietni nservi waħdi? Għidilha mela sabiex tgħinni!’ Imma s-Sid weġibha, ‘Marta, Marta, qed tinkwieta u tinsab aġitata dwar qabda ħwejjeġ, imma hemm bżonn ta’ kemxejn ħwejjeġ, jew ħaġa waħda. Marija għażlet il-porzjon it-tajjeb, li mhux se jitteħdilha’” (Luqa 10:38-42).
Id-dispożizzjoni u l-kondotta taż-żewġ aħwa, Marta u Marija, abbli jissuġġerulna x-xewqat u l-aġir tal-ġisem u l-ispirtu, li minnhom kull Kristjan hu kompost. Il-ġisem iħobb jinkwieta u jiffissa fuq patafjun interessi. Dejjem għaddej; qajla ssibu skomdu. Dejjem irid, rari sodisfatt, qatt verament hieni. Iżda l-ispirtu jagħżel il-parti superjuri, “il-porzjon it-tajjeb.” Hu tabilħaqq dehni fl-għażla tiegħu, sodisfatt bl-oġġett tiegħu, u realment feliċi fit-tgawdija tiegħu.
Sakemm il-Kristjan hu taħt l-influwenza prevalenti ta’ dan “il-porzjon it-tajjeb,” ma jilmenta xejn. Din il-ħaġa waħda, it-tgawdija t’Alla, kienet il-Ġenna tal-ewwel ġenituri tagħna. Għatx għat-tgawdija ta’ żewġ ħwejjeġ – it-tagħrif tal-ħażin kif ukoll tat-tajjeb – ikkawża l-gwaj kollu, u rrendiehom miżerabbli. Huwa dat-tagħrif tal-ħażen illi jżomm il-posteri kollu tagħhom fiċ-ċirkostanzi mdejqa li fihom waqgħu. Xi wħud minnhom, bi grazzja, jinġiebu biex isiru jafu “l-porzjon it-tajjeb,” il-bżonn ta’ “ħaġa waħda.” X’inhi din jekk mhix it-tagħrif salviviku ta’ Alla s-Salvatur?
It-talba kontinwata tal-appostlu kienet preċiżament biex “insir nafu” (Filippin 3:10). Marija kienet kuntenta fit-tgawdija ta’ dat-tagħrif. L-Imgħallem innifsu jagħmlilha kommendazzjoni sabiħa. L-għażla tagħha sejħilha l-parti tajba “li mhux se titteħdilha.”
Talba: “Missierna, agħtina biex nagħmlu d-deċiżjonijiet u l-għażliet tagħna fid-dawl ta’ Kelmtek. Agħtina illi dejjem nippreferu l-ħwejjeġ superjuri għall-avvanz spiritwali tagħna, u fuq kollox għas-sebħ ta’ ismek. Tippermettilniex nieqfu fit-tajjeb bla ma nixxenqu għall-aħjar, f’isem Kristu Ibnek. Ammen.”
Comments