“Ħa ma tipproċiedi l-ebda kelma mħassra minn fommkom, iżda biss kwalunkwe kelma tajba għall-edifikazzjoni ta’ ħaddieħor, skont kif tirrekjiedi l-okkażżjoni, sabiex tagħti grazzja ’l dawk li jisimgħuha. U tnikktux lill-Ispirtu s-Santu t’Alla, li bih kontu ssiġillati għal jum il-fidwa. Ħa jitwarrab minnkom kull imrar, għadab u rabja, għajjat klamoruż u diffamazzjoni, ma’ kull forma ta’ malizzja. Kunu benevolenti ma’ xulxin, kumpassjonali, u aħfru ’l xulxin, bħalma Alla ħafer lilkom fi Kristu” (Efesin 4:29-32).
Alla li jaħfrilna jżommna taħt il-ħarsien omnipotenti tiegħu. Xogħlu mibdi fina ma jisfax abbandunat. Bniedem maħfur, ġustifikat permezz tal-fidi fi Kristu waħdu, għalkemm jista’ u kultant jaqa’ fis-srew ta’ dnubiet moqżieża, qatt ma jistgħu jordmuh hekk illi jirriversjaw il-maħfra, jew jirreduċuh għal stat ta’ kundanna. Ladarba ġustifikat, jibqa’ ġustifikat għall-eternità.
Kif nista’ nkun naf li ngawdi l-maħfra? M’għandikx għalfejn tixxabbat sal-Ġenna biex tikkonsulta xi reġistri jew kotba, u hekk taċċerta ruħek intix imħabbeb m’Alla. Ittawwal biss f’qalbek stess, u ara jekk intix kapaċi taħfer lill-oħrajn, intix attwalment qed taħfrilhom, kull meta jonqsuk, sinċerament u bla kondizzjoni. Jekk temmen l-evanġelju u allura tgħallimt taħfer, m’għandikx għalfejn tiddubita – Alla ċertament ħafirlek. “Jekk taħfru lill-bnedmin ħtijiethom,” jassigurana l-Imgħallem, “jaħfrilkom ukoll Missierkom li hu fis-smewwiet.” U minnufih iwissina wkoll, “Iżda jekk ma taħfrux lilll-bnedmin ħtijiethom, lanqas Missierkom ma jaħfrilkom ħtijietkom” (Mattew 6:14-15). Min qal dad-diskors għamel tajjeb għalih: xerred id-dmugħ għal dawk li xerrdulu demmu.
Mela min jiddomanda l-ħniena bla ma juriha hu nnifsu jkun qed jirrovina l-pont li se jkollu bżonn jgħaddi minn fuqu. Bniedem jispiċċa fl-abbissi tal-infern jekk imut fi dnubietu, jekk ma jemminx l-evanġelju, jekk ma jindimx, iżda wkoll jekk ma jaħfirx lill-proxxmu.
Bħala wliedu nitolbuh għall-maħfra, sabiex immantnu mixja nadifa miegħu, u komunjoni ħelwa. Nagħmluha ċara, anke jekk ikollna nirrepetu: bħala Mħallef diġà ħafrilna kompletament, passat, preżent, futur. Bħala Missierna, però, għat-taqdis tagħna, nitolbuh, “Aħfrilna djunna, bħalma aħna naħfru lill-midjunin tagħna” (Mattew 6:12). Atteġġjament u prattika bħal din togħġob lill-Missier, iżda għan-natura midinba tagħna hi frosta qalila. Għax l-istqarrija timmortifika l-korruzzjoni, tkisser il-qalb, u tingaġġana għal ħajja qaddisa.
Talba: “Alla Missierna, infaħħruk u nroddulek ħajr talli f’ġieħ id-demm ta’ Kristu Ibnek ma tgħoddilniex it-trasgressjonijiet tagħna u lanqas il-ħażen li għadu mqabbad magħna. Grazzi għax-xhieda tal-grazzja tiegħek f’ruħna, illi ninsabu determinati biex naħfru lill-proxxmu tagħna mill-qalb. Kompli seddaqna bil-qawwa u l-ħniena tiegħek. Hekk nonorawk, u hekk ikollna konferma solida tal-ħidma tal-grazzja tiegħek f’ruħna. Ammen.”
Comments