“Wieħed mill-kriminali mdendla hemm insultah, ‘Ewwilla m’intix il-Messija, int? Salva lilek innifsek u lilna!’ Imma l-malefattur l-ieħor ċanfru. ‘Int lanqas tibża’ minn Alla,’ qallu, ‘ladarba tinsab taħt l-istess sentenza ta’ kundanna? Aħna tabilħaqq ġustament, għax qegħdin nirċievu lura x’ħaqqna għal li għamilna, imma dan ebda misfatt m’għamel.’ Imbagħad qal, ‘Ġesù, ftakar fija meta tiġi f’saltnatek!’” (Luqa 23:39-42).
Aktar ma wieħed jittratieni biex jikkonverti, aktar qed jagħmilha diffiċli u kumplikata. Sakemm toqgħod taħsibha, Alla hu aktar provokat, ix-xellej ta’ ruħek aktar inkuraġġit, qalbek aktar imwebbsa, dejnek aktar miżjud, ruħek aktar perikolata, u d-diffikoltajiet marbuta mal-konverżjoni kull jum li jgħaddi aktar multiplikati. Jekk tħalli mil-lum għall-għada, għandek ġurnata oħra minn xiex tindem, u ġurnata inqas fiex tindem. Jekk tgħid, “Għada nibda ħajja ġdida, fil-qdusija,” inevitabbilment qed tgħid ukoll, “Illum se nibqa’ f’ħajja qadima, fid-dnub.”
Iżjed ma tibqa’ passiv, meta taf x’inhu l-pass neċessarju, iżjed dnubek jitqawwa u jrabbi l-għeruq. Jekk m’intix kapaċi tilwi fergħa, x’se tagħmel meta teħxien f’zokk? Kull dewmien perikoluż, għax il-qalb tibred u tiksaħ, u l-affezzjonijiet tagħna jaqgħu.
Satana ftit li xejn għandu tama li jegħlibna jekk ma jirnexxilux jipperswadina biex nittraskuraw dmirijietna meta jdoqq l-arloġġ. Għaldaqstant, sengħetu kollha hi kkonċentrata filli jħajjarna nipposponu, inħallu kollox għal ħin aktar adatt u aħjar. Jgħidilna, “Agħmilha siegħa oħra; ħalliha għall-għada jew il-ġimgħa d-dieħla. U għala mhux fis-sena l-ġdida?” Inessina illi d-dewmien hu tip ta’ ċaħda.
Xi wħud fostna huma bħal dawk l-għarajjes illi tant idumu għarajjes li jispiċċaw ma jiżżewġu qatt. Hekk ħafna jinnamraw ma’ Kristu bla qatt ma jingħaqdu miegħu mistikament, b’fidi u ndiema vera.
Hemm min hu msejjaħ fl-ewwel siegħa, ċoè, fl-infanzja jew fi tfulithom, bħalma ġralhom Samwel, Ġeremija u Ġwanni l-Battista. Xi wħud jissejħu fit-tielet siegħa, ossija f’żgħożithom - bħala eżempji għandna lil Danjel, Timotju u Ġwanni l-evanġelista. Jerġa’ oħrajn fis-sitt siegħa, f’nofs għomorhom, bħal Pietru u Indrì. Alla jogħġbu jsejjaħ ukoll fil-ħdax-il siegħa, nies bħal Ġużeppi t’Arimatea u Nikodemu.
Meraviljożament, biex jikkonvinċina kemm is-salvazzjoni ma tiddependix minna nfusna, il-Mulej ġie li jsejjaħ imqar fl-aħħar minuta tal-aħħar siegħa, kif naraw fil-ħalliel mislub maġenbu. Il-Bibbja, li tkopri storja ta’ eluf kbar ta’ snin, tirrekordja każ wieħed biss ta’ konverżjoni preċiżament qabel il-mewt: waħda biex ħadd ma jiddispra, imma waħda biss biex ħadd ma jippreżumi. Jekk ftit huma li se jsalvaw, jerġa’ estremament ftit wisq huma dawk li se jsalvaw fl-aħħar nifs. Almenu m’għandna ebda evidenza li huwa l-kuntrarju.
Talba: “O Alla, int sid il-vinja; int tikri ħaddiema u tibgħathom biex jaħdmu għalik. Issejjaħna kmieni jew tard, ngħodduha bħala barka insuperabbli illi ninsabu f’saltnatek biex inservuk, nadurawk u nagħtuk ġieħ. Tħalliniex inkunu bierda fil-ħeġġa jew mitluqin fit-tama. Dment li għadu l-jum, ħa nkun attivi f’għemejjel tajba biex il-glorja tiegħek tkun aktar u aktar dikjarata fost il-bnedmin. F’isem Kristu Ibnek. Ammen.”
Comments