“Ġieħ għall-bniedem li jitbiegħed mill-ġlied, iżda l-boloh kollha jiġġieldu. Bħal wieħed li jaqbad kelb minn widnejh, hekk hu min ikun għaddej u jindaħal fi ġlied li mhux tiegħu. Bniedem b’qalb rgħiba jqajjem il-ġlied, iżda min jitma fil-Mulej ikollu r-risq. Wieħed imgħaddab iqajjem il-ġlied, u min jitbaqbaq jagħmel ħafna ħtijiet” (Proverbji 20:3; 26:17; 28:25; 29:22).
Konċett bħal dan jeħodha direttament kontra l-mentalità tad-dinja. Huwa unur, jgħidulna, jekk tiġġieled għad-drittijiet tiegħek. Qum, int jistħoqqlok aħjar. Iġġieled. Dan narawh ta’ kuljum madwarna fuq ix-xogħol, fost il-ġirien, fost il-ħbieb u f’ħafna familji wkoll.
Hija ħasra kif ħafna Kristjani, imsejħa biex ikunu ambaxxaturi tal-Prinċep tal-Paċi, iġibu rwieħhom bħall-bqija tad-dinja. X’jibqa’ mit-testimonjanza tal-Kristjan li hu miġġieled ma’ dak jew mal-ieħor? Tassew ma jistax ikun hemm paċi jekk iż-żewġ partijiet ma jaħdmux flimkien. Qed tagħmel il-parti tiegħek? Lest li saħansitra ċċedi l-hekk imsejħa drittijiet tiegħek biex tippromwovi s-sliem? Jappella l-appostlu Pawlu: “Għaliex aktarx ma ssofrux id-dannu? Għaliex aktarx ma tkunux iffrodati?” (1 Korintin 6:7).
Għal darb’ oħra, Alla jsejħilna biex aħna l-poplu tiegħu ma nagħmlux bħalma jagħmlu nies oħra, ma naqgħux għal-livell baxx tagħhom. Id-dinja tagħti ġieħ lil dak li jqum, jippoppa sidru u jiġġieled għad-drittijiet tiegħu. Lill-ġwejjed u l-kieni tikkonsidra iblah. Imma Alla jfaħħar lil dawk li jobogħdu l-ġlied u b’kull mezz jiskansawh u jitbiegħdu minnu. Jittimbra bħala boloh lill-ġellieda u l-vjolenti.
Xi trid int: l-approvazzjoni tad-dinja jew il-kommendazzjoni t’Alla? Il-prova tar-risposta tiegħek tkun meta xi ħadd jabbuża minnek. X’tagħmel? Tagħmel xenata jew tfittex li ġġib is-sliem? Int gwerrier jew paċier? “Imberkin il-paċieri, għax huma għad jissejħu wlied Alla” (Mattew 5:9).
Sakemm int tibqa’ tqis lilek innifsek bħala alla żgħir, se tkompli tiġġieled għall-pożizzjoni tiegħek – u r-riżultat ikun taħwid, kull diżgwid u għemil ħażin. Iżda jekk int tibda tqis lilek innifsek bħala qaddej t’Alla, u ta’ għajrek, tista’ tibda bl-umiltà żżomm lill-oħrajn bħala aħjar minnek.
Ħabib, jekk dal-kliem iżarżar f’widnejk, u ma jsib ebda post f’qalbek, kun af li l-problema ma tinsabx f’dal-prinċipju bibliku, iżda f’widnejk tqal u f’qalbek iebsa. Għaliex twarrab il-Kelma t’Alla?
Talba: “Fil-povertà spiritwali tiegħi, jien indur lejk, o Alla ta’ ġenerożità bla fini. Filwaqt li nistqarr ħtijieti, saħħaħni biex ma nerġax naqa’ fl-istess għeltijiet hekk li nkasbar lil ismek. Nitolbok mill-qalb: agħmilni strument tas-sliem. Fejn hemm il-mibegħda ħallini ndaħħal imħabbtek, f’isem Ibnek il-Maħbub. Ammen.”
Comments