“Fih għandna l-fidwa permezz ta’ demmu, il-maħfra tad-dnubiet, skont l-għana tal-grazzja tiegħu li fawwar ġenerożament fuqna. B’kull għerf u fehma għarrfilna l-misterju tal-volontà tiegħu skont l-għoġba tiegħu, li intenzjona fi Kristu, għall-amministrazzjoni adatta għall-milja taż-żminijiet, ċoè, li jiġbor kollox flimkien fi Kristu, il-ħwejjeġ fis-smewwiet u l-ħwejjeġ fuq l-art; iva, fih. Fih konna magħmulin werrieta, billi konna ppredestinati skont il-pjan ta’ dak li jopera kollox f’konformità mal-għan tal-volontà tiegħu, ħalli aħna, li ttamajna l-ewwel fi Kristu, inkunu għat-tifħir tal-glorja tiegħu” (Efesin 1:7-12).
Nemmen bla ebda eżitazzjoni li kulma jiġri fid-dinja u lil hinn minnha hu t-twettiq tal-pjan etern t’Alla, li qed iseħħ fin-nisġa taż-żmien, fost l-anġli u l-bnedmin. Il-konċett hu magħruf teoloġikament bħala l-providenza divina. Għalkemm il-kelma nfisha, ‘providenza,’ ma niltaqgħux magħha fl-Iskrittura, frattant tirrappreżenta dottrina tabilħaqq skritturali. Insibu espressjonijiet ad hoc bħal, “hu jagħti l-ikel lill-ħlejjaq kollha,” jew, “jibgħat l-għejjun għal ġol-widien,” li jesprimu f’sitwazzjonijiet konkreti l-atti setgħana t’Alla lejn ulied il-bnedmin.
Ladarba hu fi Kristu li r-relazzjoni t’Alla magħna hi stabbilita, jekk nagħmlu tentattiv nifhmu l-providenza apparti mill-Iben, il-Medjatur, ikollna biss rappreżentazzjoni żbaljata mill-bidu. Fi Kristu Ġesù, Alla waqqaf ir-relazzjoni bejnu u l-ħlejqa. Wiegħed li jwettaq l-għan tiegħu fil-ħolqien sal-konklużjoni trijonfanti, meta “jerġa’ jiġi biex jagħmel ħaqq mill-ħajjin u mill-mejtin; u s-saltna tiegħu ma jkollhiex tmien.” Ir-relazzjoni primittiva m’Adam, imġedda ma’ Noè, mhi xejn inqas in Christo mill-patt ma’ Abram jew Mosè. Il-Bejjien jew il-Medjatur, il-Kelma inkarnata, jistabbilixxi din ir-relazzjoni, u fih Alla jsir Alla ta’ Abram, Iżakk, u Ġakobb. Isir Alla ta’ Sidrak, Mesek u Abednegu; u huma jsiru l-poplu tiegħu.
Il-kreazzjoni hu “l-palk” li fuqu huma maħduma t-trattamenti t’Alla mal-umanità. Il-providenza hi l-operazzjoni grazzjuża li biha Alla jesegwixxi l-pjan etern fi Kristu, li tirriżulta fir-relazzjonijiet tiegħu mal-bniedem. Mill-punt di vista bibliku, il-ġrajja dinjija u l-għomor personali tagħna jippossiedu sinifikat biss fid-dawl tal-inkarnazzjoni. L-istorja skwallida ta’ konkupixxenza fit-trattamenti ta’ Ġuda ma’ Tamar issib postha fil-ġenealoġija tal-Messija; u Ċesru Awgustu kiseb it-tron ta’ Ruma minħabba t-tarbija mhix magħrufa mqiegħda f’maxtura f’Betlehem!
Talba: “Tabilħaqq, o Mulej, kif għarraftna, hekk qed tagħmel. Int topera kollox f’konformità mal-għan tal-volontà tiegħek stess, u m’hemm ħadd li kapaċi jipprotesta u wisq inqas jirreżistik. Id-dominju tiegħek hu minn ġenerazzjoni għall-oħra. Aħna nfaħħruk u nberkuk għat-treġija għarfa u setgħana tiegħek. Aħbina fik; kun int it-torri tas-sigurtà tagħna, fi Kristu Ibnek. Ammen.”
Comments