“O Mulej, għaliex qiegħed ’il bogħod minni? Għaliex tinħeba fi żmien l-għali? Fil-kburija tiegħu l-ħażin ippersegwita lill-fqar; jinqabdu fin-nases li nasbilhom. Bix-xewqat ta’ qalbu jiftaħar il-ħażin, u jbierek ir-rgħiba, li l-Mulej jistmell. Il-ħażin, fil-kburija ta’ wiċċu, ma jfittixx lill-Mulej; fi ħsibijietu kollha m’hemmx Alla” (Salmi 10:1-4).
L-Iskrittura tagħmel dijanjosi tad-dnub u tpenġih bħala diformità universali fin-natura umana, misjuba f’kull aspett f’kull persuna. Hu deskritt bħala ribelljoni kontra saltnet Alla, timmissja l-bersall li Alla qiegħed quddiemna biex nimmiraw lejh, it-trasgressjoni tal-liġi divina, u d-diżubbidjenza għad-direttivi t’Alla. Bid-dnub il-bniedem joffendi l-purità assoluta t’Alla billi jniġġes lilu nnifsu u jġib ħtija quddiem l-Imħallef omnixjenti tiegħu.
Din id-diformità morali hi dinamika: id-dnub hu żvelat bħala enerġija ta’ reazzjoni irrazzjonali, negattiva u xewwiexa għas-sejħa u l-kmand t’Alla. Hu spirtu ta’ ġlied kontra Alla; bi dnub wieħed ikun qed jagħmilha ta’ Alla. Għerq id-dnub hu l-kburija u l-għadwa kontra l-Mulej, l-ispirtu li ħakem fuq Adam fl-ewwel trasgressjoni tiegħu.
L-atti midinba dejjem għandhom warajhom ħsibijiet, motivi u xewqat illi b’xi mod jew ieħor jesprimu l-oppożizzjoni stinata tal-qalb apostata għad-dritt t’Alla fuq ħajjitna.
Talba: “Missier, it-tama tiegħi hi waħda: fejn id-dnub kotor, il-grazzja tiegħek taf toktor wisq aktar. B’din il-konfidenza nersaq lejk, għax nemmen illi minħabba s-sagrifiċċju ta’ Ibnek int issa rikonċiljat miegħi, u jien miegħek. Tagħmilni wkoll kapaċi niskarta d-dnub, għax m’għadnix taħt il-liġi, iżda taħt il-grazzja sovrana u suffiċjenti tiegħek. Għalhekk jien infaħħrek u nbierek lil ismek. Ammen, issa u għal dejjem.”
Comments