“Ħa ma tipproċiedi l-ebda kelma mħassra minn fommkom, iżda biss kwalunkwe kelma tajba għall-edifikazzjoni ta’ ħaddieħor, skont kif tirrekjiedi l-okkażżjoni, sabiex tagħti grazzja ’l dawk li jisimgħuha. U tnikktux lill-Ispirtu s-Santu t’Alla, li bih kontu ssiġillati għal jum il-fidwa. Ħa jitwarrab minnkom kull imrar, għadab u rabja, għajjat klamoruż u diffamazzjoni, ma’ kull forma ta’ malizzja. Kunu benevolenti ma’ xulxin, kumpassjonali, u aħfru ’l xulxin, bħalma Alla ħafer lilkom fi Kristu” (Efesin 4:29-32).
Biex timxi, taħdem u tgħix ma’ ħaddieħor taħt l-istess saqaf, sistema effettiva ta’ komunikazzjoni hija prijorità. Importanti dejjem tinżamm fi stat funzjonabbli u effettiv, bla ma ssofri ħsara. Żewġ persuni ma jistgħux jimxu flimkien jekk ma jaqblux bejniethom.
Armonija kontinwa, progressiva u sodisfaċenti hija impossibbli mingħajr taħdit mibni fuq prinċipji bibliċi. Il-komunikazzjoni hi s-sengħa bażika meħtieġa biex nistabbilixxu u mmantnu relazzjonijiet sensibbli u sodi. Ma teżistix familja b’saħħitha b’komunikazzjoni batuta: hi l-qalb taż-żwieġ. Imqar koppji mhux Kristjani, li għandhom is-sens komun li jkunu relattivament trasparenti ma’ xulxin, igawdu żwieġ relattivament b’saħħtu. Almenu jiffunzjona.
Wara kull falliment matrimonjali ssib li jkun hemm tkissira serja fil-komunikazzjoni ġenwina. Hemm l-onestà u hemm l-isforzi, imma mhumiex jiftiehmu bejniethom.
Darba, hu u għaddej minn lokalità residenzjali, wieħed frustier jinnota raġel ieħor jissara b’magna tal-ħasil fl-entratura tad-dar tiegħu. Il-barrani vvoluntiera biex jgħin, u l-ieħor feraħ bih. Iż-żewġt irġiel ħadmu flimkien u ħadu battikata. Wara xi minuti sforz bla ma avvanzaw imqar pulzier, waqfu t-tnejn u ċċassaw lejn xulxin, frustrati. Kienu totalment eżawriti.
Finalment, meta ħadu n-nifs, il-barrani qal lil sid id-dar: “Tinkwetax! Bis-sewwa jew bid-dnewwa ndaħħluha, tafx!”
“Xiex?” wieġbu l-ieħor mikdud. “Jien noħroġha rrid, mhux indaħħalha!”
Talba: “Nitolbuk, Missier, biex issaħħaħna fit-taħdit u d-diskors ta’ bejnietna. Insibuha diffiċli nesprimu lilna nfusna adegwatament; ġieli jitlagħlna u kultant naqgħu fil-muta. Faċli mmorru minn estrem għall-ieħor. Mexxina f’bilanċ sabiħ, fejn insiru kapaċi ninformaw, ngħallmu, inwissu, ninkuraġġixxu u nispiraw lil xulxin b’diskorsna, hekk illi nedifikaw lil xulxin u fl-istess ħin nagħtuk il-glorja. F’isem Ġesù, il-Kelma li bih għarraftna lilek innifsek, nitolbuk dan. Ammen.”
Comments