“Hekk ukoll se jkun fir-resurrezzjoni tal-mejtin. Il-ġisem hu miżrugħ fil-korruzzjoni, hu rxoxtat fl-inkorruttibilità. Hu miżrugħ fid-diżunur, hu rxoxtat fil-glorja; hu miżrugħ fid-dgħufija, hu rxoxtat fis-setgħa. Hu miżrugħ ġisem naturali, hu rxoxtat ġisem spiritwali. Jekk hemm ġisem naturali, hemm ukoll ġisem spiritwali. Hekk hu miktub: ‘L-ewwel bniedem Adam sar ruħ ħajja’; l-aħħar Adam hu spirtu li jagħti l-ħajja. L-ispiritwali mhuwiex l-ewwel, iżda n-naturali; imbagħad l-ispiritwali. L-ewwel bniedem kien mill-art, tat-trab; it-tieni bniedem hu s-Sid mis-sema. Bħalma kien il-bniedem tat-trab, hekk ukoll dawk tat-trab, u bħalma hu l-bniedem tas-sema, hekk ukoll dawk tas-sema” (1 Korintin 15:42-48).
Hija ħaġa taqbel mas-sapjenza u l-ġustizzja governattiva t’Alla illi l-istess ġisem li kien imsieħeb mar-ruħ fid-dnub jew fl-indiema jkollu sehem magħha fil-pwieni tal-Infern jew fil-feliċità smewwitija.
Hekk l-Iskrittura tiddikjara profetikament, b’diversi modi u tixbihat, illi l-ġisem, miżrugħ fit-taħsir, għad jitqajjem fl-inkorruttibbiltà; il-ġisem li jkun ċeda għall-mewt ikun irxoxtat għall-immortalità fl-Aħħar Jum. Ir-ruħ u l-ġisem huma ż-żewġ partijiet essenzjali tal-bniedem: Alla hekk ikkostitwiena. U għalkemm l-inugwaljanza hi kbira fl-operazzjonijiet tagħhom inkwantu l-qdusija, frattant il-qbil u l-armonija tagħhom hija neċessarja. Azzjonijiet tajba huma ppjanati skont il-fehma u r-riżoluzzjoni tal-ispirtu, ossija r-ruħ, imma jiġu mwettqa bil-ministeru tal-laħam, il-membri diversi ta’ ġisimna.
Kull grazzja tesprimi lilha nfisha f’atti viżibbli mill-ġisem. Fid-dieqa tal-indiema l-ġisem jissupplixxi d-dmugħ, fis-sawm l-aptit tiegħu hu mrażżan, fir-ringrazzjament l-ilsien jitħaddem f’tifħir rikonoxxenti lill-Mulej. Il-vittorji kollha fuq il-pjaċir sensibbli u l-uġigħ huma ottenuti mir-ruħ f’konġunzjoni mal-ġisem.
Issa Alla, fit-tjieba kbira tiegħu, ra illi m’għandux jittratta lir-ruħ radikalment differenti mill-għamara li fiha għexet. Jekk ir-ruħ għandha tkun hienja għall-eternità, il-ġisem m’għandux jintesa fit-trab. Ir-ruħ mhix se tkun glorifikata fil-Ġenna, u l-ġisem mormi f’qiegħ l-art. Mindu bdew l-eżistenza tagħhom, it-tnejn ġrew flimkien fl-istess tellieqa, mill-ġuf fejn tnisslu, sal-aħħar nifs. Allura Alla ddetermina li jieħu premju wieħed, jew inkella kastig wieħed. Għax hawnhekk il-ġisem jakkumpanja lir-ruħ f’ubbidjenza u tbatijiet, fl-eżultanza u d-dieqa. Għalhekk meta l-kuruna tal-purità jew il-palma tal-martirju tingħata mill-Imħallef tas-sema u l-art quddiem kulħadd, kemm ir-ruħ kif ukoll il-ġisem, flimkien, jieħdu sehem mill-istess unur.
Ta’ dan l-arranġament għandna bħala garanti r-reżurrezzjoni ta’ Kristu fil-ġisem veru tiegħu, għax hu “l-ewwel frott ta’ dawk li raqdu.”
Talba: “O Alla, int l-Imħallef tas-sema u l-art. Persważi illi int tiġġudika b’rettitudni sħiħa. Skont l-għemejjel tagħna troddilna lura. Nappellawlek, mela, sabiex bil-perseveranza fl-għemil it-tajjeb infittxu l-glorja, l-unur u l-immortalità, ħalli b’hekk nassiguraw ruħna illi ninsabu fil-grazzja tiegħu, u werrieta tal-ħajja ta’ dejjem, bil-medjazzjoni effikaċi ta’ Ibnek Ġesù.”
Comments