“F’dan niftakar jien, waqt li ruħi tinħall ġewwa fija, kif jien kont immur fil-ġemgħa, u neħodha f’dar Alla, fost l-għajjat ta’ ferħ u radd il-ħajr ta’ ġemgħa ferħana. Għaliex int mifnija, ruħ tiegħi? Għaliex int hekk imħawda ġewwa fija? Ittama f’Alla, għax jien nibqa’ nfaħħru; hu s-salvazzjoni tiegħi, u Alla tiegħi. Ruħi mifnija ġewwa fija; għalhekk fik niftakar, o Alla tiegħi, mill-art tal-Ġordan, mill-muntanji tal-Ħermon, u mill-muntanja ta’ Misgħar” (Salmi 42:4-6).
F’perjodu ta’ dieqa, il-ħsieb dwar ħabib għażiż, li kkonfortana fl-imgħoddi, għandu ħabta jissollevana. Jekk inkunu assigurati minn imħabbtu, ma niddubitawx kemm hu lest biex jassistina. X’barka inesprimibbli meta ngħixu f’familjarità qaddisa m’Alla tal-imħabba! David iferra’ liberament l-ilmenti tiegħu u jaqsam m’Alla l-għali tiegħu. Għalkemm ruħu kienet milwija fih, u d-dawl ħelu tal-ferħ kien mistur bi sħab fosk ta’ dieqa, frattant l-għajn penetranti tal-fidi tħares lil hinn minnu. Minkejja ċ-ċirkostanzi u s-sentimenti tiegħu, għandu komunikazzjoni diretta m’Alla.
“O Alla tiegħi!” jgħidlu. Għalkemm dipressat, assedjat b’oskurità, xorta waħda jittama u jinkuraġġixxi ruħu. Nistgħu nħossuna qed negħrqu, frattant Ġesù hu fuq il-leminija tal-Maestà għan-nom tagħna. Tissograx tinsa dan! L-għadu tagħna m’għandux għalfejn jifraħ, għax xorta waħda niftakru f’Alla; ħsibijietna huma diretti lejh.
Bħalissa jista’ jkun mudlam, iżda niftakar żminijiet mgħoddija ta’ dawl u mħabba. Jekk rasi tmil, Alla kapaċi jerfagħhieli. Id-dawl ta’ wiċċu rikonċiljat, f’Ġesù, diġà idda fuqi. Is-sħab jista’ jinterċetta l-veduta ferrieħa ta’ dan kollu, iżda Alla xorta waħda jarani, u jaf bija, u mhux se jirtira mħabbtu minni. Il-każ tiegħi jinsab quddiemu. Żminijiet ta’ freskezza jiġu mill-preżenza tiegħu. Hekk tirraġuna l-fidi.
Jekk bħalissa għaddej mid-dlam, immedita fuq l-għanijiet tajba tiegħu, il-wegħdi rikki u l-grazzja ħielsa fi Kristu. Żomm sħiħ mal-kelma veraċi tiegħu. Inkunu qed nagħmlu l-aħjar użu mill-memorja meta niftakru t-trattamenti passati t’Alla magħna. Hu fidil, u mhux se jwarrabna għal dejjem.
Talba: “Faċilment ninsew, Mulej, Alla tagħna, illi int tmantni kontroll assolut fuq kull avveniment, fuq kull ħlejqa, fuq l-anġli u l-bnedmin. Ħa nifhmu illi l-glorja tiegħek hi mifruxa mas-smewwiet u l-art, u kollox hu tqil bis-sens tal-grandizza u l-maestà tiegħek. Għaldaqstant żommilna l-fiduċja tagħna fik, bla ma nivvaċċillaw, jiġri x’jiġri, għax int tafna b’isimna. Ammen.”
Comments