“Imma intom mhux hekk tgħallimtu ’l Kristu. Indubjament smajtu lilu u kontu mgħallmin fih, skont il-verità li hi f’Ġesù. Rigward l-imġiba preċedenti tagħkom, kontu mgħallmin tinżgħu l-bniedem qadim li qed jikkorrompi ruħu skont ix-xewqat qarrieqa; tkunu rrenovati fl-atteġġjament ta’ moħħkom; u tilbsu l-bniedem il-ġdid, li skont ix-xbieha t’Alla hu maħluq fil-ġustizzja u l-qdusija vera. Għaldaqstant, billi tneħħu l-falsità, tkellmu l-verità, kull wieħed minnkom, mal-proxxmu tiegħu, għax aħna membri ta’ xulxin. Irrabjaw u frattant tidinbux. Tħallux ix-xemx tgħarrab fuq il-korla tagħkom, lanqas tagħtu opportunità lix-xitan” (Efesin 4:20-27).
Il-korla tibda bl-imbeċillaġni u dejjem tispiċċa mgħarrqa fir-rimors. Hemm żewġ sitwazzjonijiet li fihom qatt m’għandna ngħaddbu: meta nistgħu nikkontrollaw il-qagħda, u meta ma nistgħux nikkontrollawha. Meta wieħed jisbel jista’ jsir elokwenti imma ma jsir xejn aktar xjenti; fqir kien u ifqar ikun. B’kelma ġentili abbli ġġibu f’postu bħalma l-ġamar jitberred bir-raxx tal-ilma. Ir-rabja ristretta hi sapjenza mirbuħa.
Għalhekk ittratta r-rabja bħallikieku pranzu appetituż. Ħu l-ħin tiegħek u ddiġerih bil-mod. Imbagħad isma’ l-mużika favorita, u ħalli tiddriftjak għal ġo lejl li fih tieħu raqda gwappa. Fid-dawl ta’ jum ġdid, jekk ir-rabja għadha tiffastidjak, erġa’ ħares lejha. Aħseb kemm-il darba qabel taġixxi, li ma tmurx tispiċċa b’indiġestjoni severa.
Hemm alternattiva aħjar: il-maħfra. Il-maħfra hi l-muftieħ għall-azzjoni u l-libertà. Min mhux kapaċi jaħfer lill-oħrajn ikisser il-pont li minn fuqu jrid jgħaddi hu nnifsu, għax kull imwieled minn mara għandu bżonn il-maħfra, bħalma l-pulmun għandu bżonn l-arja.
Talba: “Missier ħanin, agħtini r-rażna fuqna nfusna; għallimni nikkontrolla l-emozzjonijiet tagħna. B’moħħi nifhem x’tirrekjiedi minni; bir-rieda tiegħi nobdik. Ġeddidli r-rieda kuljum sabiex flok għadab bla sens nesprimi kumpassjoni u maħfra lejn ħaddieħor, għall-glorja tiegħek stess. Ammen.”
Comments