“U jiġri jekk tisma’ bir-reqqa leħen il-Mulej, Alla tiegħek, u tħares u tagħmel il-kmandamenti tiegħu li qiegħed nagħtik illum, illi l-Mulej, Alla tiegħek, jgħollik fuq il-ġnus kollha tal-art. U jiġu dawn il-barkiet kollha fuqek, u jilħquk, jekk tisma’ leħen il-Mulej, Alla tiegħek. Imbierek tkun fil-belt, u mbierek tkun fir-raba’…Il-Mulej iżommok bħala l-poplu qaddis għalih, bħalma ħaliflek, jekk tħares il-kmandamenti tal-Mulej, Alla tiegħek, u timxi fi triqatu. U l-popli kollha tal-art jaraw li int tissemma b’isem il-Mulej; u jibżgħu minnek” (Dewteronomju 28:1-3,9-10).
Jekk nikkonsidraw sewwa, nirrealizzaw minnufih illi m’għandna ebda raġuni għala nitbeżżgħu mill-ġnus. Pjuttost il-kuntrarju, għax min hu fuq in-naħa t’Alla impossibbli jsofri disfatta finali. Mela kodardja jew intimidazzjoni daparti tal-Kristjan tittradixxi spirtu dgħajjef; hu biss sinjal ta’ nuqqas ta’ fidi jew, l-aktar l-aktar, fidi infantili u debboli. Alla jista’ jagħmilna tant nixbhuh, illi n-nies ikunu sforzati jaraw li aħna bir-raġun inġorru ’l ismu, u tabilħaqq aħna l-poplu tiegħu, miżmuma f’idu omnipotenti. M’hemmx li niksbu din il-grazzja, li l-Mulej hu dispost jagħtina!
Kun assigurat li l-ħżiena, imqar fis-sigriet, jibżgħu mill-qaddisin ġenwini. Jobogħduhom, jgħajruhom u jekk isibu ċ-ċans, joqtluhom, iżda wkoll jitgerrxu minnhom. Ħaman qabditu r-rogħda minħabba Mordekaj, anke meta fittex il-qirda tiegħu. Infatti, il-mibegħda tagħhom sikwit tinbet minn biża’ li, minħabba l-kburija tagħhom, ma jammettuhiex.
Mela ħa nissoktaw nimxu għal għonq it-triq tal-verità u l-ġustizzja, mingħajr l-iċken tregħid. “Tibżax, merħla żgħira, għax għoġbu Missierkom jagħtikom is-saltna” (Luqa 12:32). Il-biża’ mhux għalina, iżda għal dawk li jagħmlu l-ħsara u jiġġieldu kontra l-Mulej tal-eżerċti. Jekk tabilħaqq isem Alla etern hu fuqna, ninsabu sikuri. Ħa nieħdu ħsieb inqanqlu fi fjamma d-don mogħti lilna, u naqdu lil Sidna bla riżerva, “għax Alla ma taniex spirtu ta’ timidezza, iżda spirtu ta’ setgħa, ta’ mħabba u ta’ dixxiplina fuqna nfusna” (2 Timotju 1:7).
Bħalma fl-antik wieħed Ruman kellu biss jgħid, “Romanus sum” (“Jien Ruman”), biex jirċievi l-protezzjoni tal-imperu vast, hekk ukoll il-bniedem t’Alla għandu l-Omnipotenza bħala l-gwardja tiegħu. Alla jippreferi jbattal l-univers mill-galassji innumerabbli milli jħalli fidil wieħed mingħajr difiża.
Talba: “Mulej Alla omnipotenti, int Missieri. Nifhem illi m’għandix għalfejn nibża’ mill-waħx tal-lejl, u lanqas mill-vleġġa li tittajjar binhar. Hi u tinxtered, il-pesta ma tmissnix u lanqas il-ħerba li tiddistruġġi f’nofsinhar. Lilek nixtieqek bħala l-kenn tiegħi, biex ebda deni ma jiġrili, u ebda ħsara ma tersaq lejn għamarti. Agħmilni iżjed qalbieni minn iljun għas-sewwa, għax int miegħi. Tifħirek se jkun fuq fommi. Ħalleluja!”
Comments