“Alla ta’ Iżrael tkellem, il-Blata ta’ Iżrael qalli, ‘Min jaħkem fuq in-nies għandu jkun ġust, jaħkem bil-biża’ tal-Mulej. U hu jkun bħad-dawl tas-sebħ, xħin titla’ x-xemx f’għodwa bla sħab, u tnibbet il-ħaxix tari mill-art, bid-dija tagħha wara x-xita.’ Mhix hekk dari quddiem Alla, ladarba hu għamel miegħi patt dejjiem, imħejji f’kollox, u mħares? Mhux hu li jnissel il-ħelsien tiegħi kollu u kulma nixtieq?” (2 Samwel 23:3-5).
Din mhix wegħda waħda iżda ħemel ta’ wegħdi – kaxxa ta’ perli leqqiena. Ir-rabta, jew patt, li l-Mulej Alla għamel ma’ David hi l-arka li fiha jinġabar kollox. Mill-patt divin inixxu l-barkiet għall-fidili tiegħu.
Hawn għandna rekordjati l-aħħar kliem ta’ David, iżda jistgħu jkunu tiegħi llum. Hawnhekk għandna tnegħida: m’għandix kollox kif nixtieq jien. Hemm il-provi, it-tħassib u d-dnubiet. Dawn jagħmlu l-imħabba tiegħi iebsa.
Hawnhekk għandna solliev: “Hu għamel miegħi patt dejjiem.” Jaħwe ntrabat miegħi bi pleġġ, u ssiġilla l-patt bid-demm ta’ Kristu. Jien marbut m’Alla tiegħi, u hu miegħi.
Dan iġib fi prominenza kbira s-sigurtà, ladarba dal-patt hu għal dejjem, imħejji f’kollox u mħares. M’hemm xejn minn xiex tibża’ tul il-ġirja tas-snin, minħabba xi inċertezza jew xi fattur minsi. Il-patt hu pedament solidu; fuqu tista’, u jmissek, tibni fil-ħajja u fil-mewt. Hu l-inizjattiva t’Alla lejna, u allura nagħrfu kemm tabilħaqq hu favur il-maħturin tiegħu.
David iħoss ċertu sodisfazzjon. Jaf li hu salvat, u Alla jitgħaxxaq bih. Il-patt m’Alla hu dak kollu li nistgħu nixtiequ. Nidħlu biex nieħdu sehem f’dal-patt billi nafdaw fi Kristu bħala s-Sid u s-Salvatur tagħna.
Innota d-differenza bih u mingħajru: “Għaldaqstant ftakru illi darba intom, il-Ġentili mit-twelid, imsejħin ‘l-Inċirkonċiżjoni’ mill-hekk imsejħa ‘ċ-Ċirkonċiżjoni’ (magħmula fil-ġisem b’id il-bniedem) – ftakru illi f’dak iż-żmien kontu mingħajr Kristu, frustieri għaċ-ċittadinanza ta’ Iżrael u barranin għall-pattijiet tal-wegħda, ma kellkomx tama u bla Alla fid-dinja. Imma issa fi Kristu Ġesù intom li darba kontu bogħod sirtu qrib bid-demm ta’ Kristu” (Efesin 2:11-13).
Talba: “Inroddlok ħajr, Missier, illi bl-operazzjoni misterjuża tal-Ispirtu tiegħek wassaltni biex indur b’fidi sempliċi lejn il-Mulej Ġesù, il-Medjatur u l-Garanti tal-patt, biex nirċevih bħala kollox f’kollox għalija. Għinni biex kuljum infittex inservih bħala s-Sultan suprem tiegħi, b’rabta dejjiema miegħu. Ammen.”
Comments