“Smajtu illi ngħad, ‘Ħobb il-proxxmu tiegħek u obgħod lill-għadu tiegħek.’ Imma jien ngħidilkom, ħobbu lill-għedewwa tagħkom u itolbu għal dawk li jippersegwitawkom, ħalli tkunu wlied Missierkom fis-smewwiet; għax itella’ x-xemx tiegħu fuq il-ħżiena u t-tajbin, u jibgħat ix-xita fuq il-ġusti u l-inġusti. Għax jekk tħobbu ’l dawk li jħobbukom, xi premju għandkom? Ewwilla ma jagħmlux saħansitra d-dazjarji l-istess ħaġa? U jekk issellmu ’l ħutkom biss, xi tkunu qed tagħmlu iżjed mill-oħrajn? Ewwilla ma jagħmlux saħansitra l-Ġentili l-istess ħaġa? Kunu mela intom perfetti, bħalma Missierkom smewwieti hu perfett” (Mattew 5:43-48).
Ma nkunu qed nagħmlu xejn speċjali jekk inħobbu biss lil dawk li jħobbuna. Il-briganti wkoll iħobb lill-briganti sħabhom. Jekk il-favuri u l-pjaċiri nagħmilhom biss ma’ nies li jaħmluni, x’benefiċċji nippretendi? Ix-xellerati u l-immorali jagħmlu l-istess ħaġa! Jekk insellef biss lil dawk li mingħandhom nippretendi rikumpensa, xi krettu għandi? Il-banavakki jassistu wkoll lil xulxin, għax jafu li xi darba jirċievu l-kumpliment lura, jew jekk ma jirċevuhx, jiddomandawh.
L-Imgħallem tagħna jeżortana, aktarx, biex immorru oltre minn dawn il-mogħdijiet konvenzjonali u loġiċi. B’sorpriża – u tant ilna nisimgħuha li qajla għadha sorpriża – iħeġġiġna biex inħobbu lill-avversarji, u nagħmlulhom il-ġid, u meta nsellfu ma nippretendux lura.
Kif jista’ jkun? Did-dottrina tgħodd, u jissograw jipprattikawha, dawk biss mimsusa bil-grazzja. Jafu li Alla jippremja l-benefiċjenza tiegħu stess maħduma fihom, uliedu. Il-wegħda tixprunahom ’il quddiem, illi għad ikunu premjati u magħrufa bħala wlied l-Ogħla. Bħalma hu nnifsu beninn mal-ingrati u mal-perversi, hekk l-imitaturi tiegħu jagħtu evidenza li għandhom rabta vitali miegħu b’azzjonijiet jixbhu lil tiegħu. “Kunu ħanina,” jikkonkludi r-Rabbi tagħna, “bħalma Missierkom hu ħanin.”
Dan mela hu t-tagħlim inkonfutabbli tal-kitbiet ispirati. Issa, fl-iżvilupp gradat tal-pjan suprem, li jifforma s-somma u s-sustanza tar-rivelazzjoni miktuba kollha, aħna preżentati b’esibizzjonijiet innumerabbli tal-beninnità divina, li meta jħallu l-impatt tagħhom fuq il-moħħ uman, huma kkalkolati, bil-barka tal-Ispirtu, illi jaffettwaw ir-rinovazzjoni tan-natura sħiħa tiegħu.
Malli l-moħħ u l-kuxjenza jkunu mdawla bi twemmin kordjali tal-verità, u malli l-qalb tiġġedded bl-esperjenza kemm tabilħaqq il-verità hi potenti, il-prinċipju tal-beninnità jibda minnufih ikun eżerċitat.
Talba: “Mgħallem tagħna, int għandek kull awtorità biex tikkmandana, u aħna bħala servi tiegħek imissna nobdu. Irridu nobduk. Inroddulek ħajr illi apparti kelmtek tajtna wkoll l-Ispirtu s-Santu ħalli internament jimmotivana u jġegħilna bi ħlewwa u konvinzjoni biex attwalment nagħmlu l-ġid lill-bnedmin kollha skont l-opportunitajiet quddiemna. Ammen.”
Comments