“Mur għand in-nemla, ja għażżien. Ħares lejn id-drawwiet tagħha, u kun għaref. La għandha kap, la sopristant u lanqas padrun; fis-sajf tħejji l-ikel tagħha, u tiġma’ l-proviżjon tagħha fi żmien il-ħsad. Kemm se ddum rieqed, ja għażżien? Meta se tqum minn ngħasek? Ftit torqod, ftit tongħos, ftit b’idejk marbuta biex tistrieħ. Hekk jiġi l-faqar tiegħek bħal wieħed ħalliel, u l-għaks tiegħek bħal wieħed armat” (Proverbji 6:6-11).
Għall-għażż bħala għażż m’hemmx skuża vijabbli. Xi wħud jikklejmjaw li huwa l-istat naturali tal-bniedem, u li llum ftit issib nies ta’ karattru biżżejjed li jissograw jibqgħu għażżiena f’ġenerazzjoni frenetika. Jgħidulek, l-għażżien jurik bil-provi li huwa kuntent, la jaspira għal iżjed u lanqas għal inqas. Anke meta n-negozjant jistinka u jishar, jonfoq saħħtu bit-tama li xi darba jirtira bil-kumdità, ċoè, isir għażżien. Frattant mhux faċli tikkonvinċih x’qed jimmissja meta okkażżjonalment jitlaq l-istim miġmugħ fih innifsu u jiftakar fl-umanità tiegħu, kif mhu xejn ħlief trab jiċċaqlaq fi triqtu mnejn inqala’.
L-iskrivan igawdi l-għażż l-aħjar meta għandu l-miktba tiegħu se ssiefer b’patafjun karti u dokumenti. Il-mara tad-dar tgawdi l-għażż l-aħjar meta l-kmamar ta’ wliedha jinsabu sottosopra u l-kċina twerżaq għall-faċendi. Ftit għażż delizzjuż, ħafna għażż iqallgħek. Ikkonsidra lilek innifsek qed tnaqqar l-ajsing ta’ kejk: tieħu naqra titla’ l-Ġenna, tieħu ħafna tirremetti.
Talba: “B’moħħi, Mulej, ħallini naħseb ħsibijietek warajk. B’riġlejja ħallini nagħmel faċendi u mmur qadjiet għalik. Bis-sensi tiegħi ħallini nżomm kuntatt mad-dinja u n-nies fiha biex intejjibhom. B’idejja ħallini nkun bieżel u produttiv, filli nkun sostenn u għajnuna għall-proxxmu. Nitolbok dan għal ġieħek stess. Ammen.”
Comments