“La żżommx lilek innifsek b’għaref; ibża’ mill-Mulej u warrab mill-ħażen. Il-biża’ tal-Mulej hi l-mibegħda tal-ħażen: it-tkabbir, l-arroganza, l-imġiba ħażina u l-fomm giddeb nobgħodhom. Il-biża’ tal-Mulej hu l-bidu tal-għerf, u li tagħraf lill-Qaddis hu dehen. Fil-biża’ tal-Mulej hemm tama qawwija, u wliedu jsibu l-kenn. Il-biża’ tal-Mulej għajn tal-ħajja, biex wieħed jeħles minn xbiek il-mewt. Bit-tjieba u l-verità jitpatta l-ħażen, u bil-biża’ tal-Mulej jinħarab il-ħażen (Proverbji 3:7; 8:13; 9:10; 14:26-27; 16:6).
Fis-sistema li minnha nagħmlu parti, il-mibegħda ma tehdiex bil-mibegħda; il-mibegħda tixxejjen biss bl-imħabba. Kurjuża din – l-imħabba u l-mibegħda huma qraba tad-demm, u l-mibegħda l-aktar pessma titnissel mill-ikbar imħabba. U bħalma jgħidu li l-imħabba għamja, kemm aktar il-mibegħda!
L-imħabba għall-virtù timplika l-istmerrija tal-vizzju. L-imħabba lejn Alla tinvolvi d-detestazzjoni tad-dnub. M’hemm ebda ħażen spiritwali sottili fil-fatt li s-sikrana, il-midgħija u l-adulteri ssibhom orgoljużi bil-vizzji li fihom jinsabu misrumin.
Aktarx, meta n-nies jarmaw jiftaħru bil-virtujiet tagħhom illi jsiru insapportabbli. It-tali nies għandhom bżonn jindmu mit-tjieba tagħhom. Għandhom fama kemm huma virtużi, u jippożaw bħala reklam għalihom infushom. Iżda, jaħasra, b’dan l-atteġġjament, bilfors isiru l-aktar nies qarsa u skuntenti, għax inkonxjament isiru jemmnu li l-feliċità kollha tagħhom tiddependi fuq kemm huma aktar virtużi minn nies oħra.
Talba: “Miegħek għandi x’naqsam, Missier. Mexxini int u żomm ħarstek fuqi, biex ma naqax fit-trappola illi nibda nkejjel lili nnifsi bil-kejl ta’ ħaddieħor, iżda biss fid-dawl tal-liġi tiegħek. Tħallinix insib sodisfazzjon fl-istadju li lħaqt s’issa, iżda dejjem niġġebbed lejn l-ogħla u l-aħjar, għax bi Kristu Ġesù kollox nista’ nagħmel. Wettaq fija dan il-potenzjal! Ammen.”
Comments