“Mosè tela’ ħdejn Alla, u l-Mulej għajjatlu mill-muntanja u qallu: ‘Hekk tgħid lil dar Ġakobb u tgħid lil ulied Iżrael: “Intom rajtu x’għamilt lill-Eġizzjani u kif erfajtkom fuq ġwinħajn ajkla, u ġibtkom lejja. Għalhekk issa, jekk tassew tisimgħu kliemi u tħarsu l-patt tiegħi, intom tkunu t-teżor partikolari tiegħi fost il-popli kollha – għax l-art kollha tiegħi – u tkunu għalija saltna ta’ qassisin u ġens imqaddes”’” (Esodu 19:3-6).
L-Emanċipatur tagħna ħabbar is-Sena tal-Ġublew, tertaq il-ktajjen u kissrilna l-qjud, u fetaħ il-kanċell tal-ħabs. Hu nnifsu jirrilaxxjana, jerfagħna fi ħdanu u jagħtina f’idejna d-Dikjarazzjoni tal-Indipendenza, ossija, li minn issa ’l quddiem ninsabu dipendenti fuqu.
“Tassew, tassew ngħidilkom,” iddikjara Ġesù, “kull min jagħmel id-dnub hu l-ilsir tad-dnub. Issa l-ilsir ma jibqax fid-dar għal dejjem, imma l-iben jibqa’ għal dejjem. Mela jekk l-Iben jilliberakom se tkunu realment liberi. Kull min jagħmel id-dnub hu l-ilsir tad-dnub, imma jekk l-Iben jagħmilhom ħelsin tkun ħelsin tabilħaqq” (Ġwanni 8:34-36). Il-libertà permanenti, anzi eterna, hi dawl li għalih id-Dawl tad-dinja miet fid-dlumija.
Forsi xi wħud jibżgħu mil-libertà għax il-libertà timponi obbligi sagri. Forsi wkoll din hi r-raġuni għala t-tirannija (morali, politika, edukattiva) hi dejjem aktar organizzata mil-libertà. Avolja meħlusin, abbli għadhom jirraġunaw fihom infushom li huwa aktar sikur għalihom jibqgħu fil-kalzri, jew almenu qrib tiegħu, milli jimirħu fil-wesgħat tal-libertà, bħal għażżiela fuq il-muntanji. Iġibu rwieħhom bħal-Lhud fid-deżert, mhedda mill-ġuħ u l-għatx. Qabdu jmaqmqu illi kien wisq aħjar kieku baqgħu l-Eġittu, jieklu l-ħjar, it-tewm u l-kurrat! Tant kellhom mentalità kolonjali illi ma setgħux japprezzaw il-libertà.
Wara storja mtawla ta’ dominanzi minn potenzi frustieri, bħala ġens għandna miżura ta’ libertà wisq aktar minn qatt qabel. Il-libertà vera hi libertà fl-usa’ sens tagħha; ristretta għall-politika hi biss libertà instabbli, imma l-libertà mill-kefrija ta’ Faragħun twitti t-triq għal identità isħaħ, u rabta ma’ Sid sovran wieħed.
Talba: “Missier, ħa nkunu konvinti quddiemek kif il-ħelsien hu l-iprem okkażżjoni biex nagħmlu aħjar minn qatt qabel. Min hu meħlus ma jistax jikkuntenta meta jqis li sħabu għadhom fi priġunerija kiefra. Għandu r-responsabbiltà jdoqq it-trumbetta, iqajjem lil sħabu minn nagħas, u f’isem il-Liberatur imexxihom barra għal għajn ix-xemx, bil-fejqan fuq ġwenħajha. Kun int l-Emaċipaur tagħhom! Inqeda bina biex inħabbrulhom it-tnedija tal-Ġublew! O li naraw aktar u aktar nies meħlusa, għalik u għall-glorja tiegħek; bi Kristu Ibnek. Ammen.”
Comments