“U nafu illi Alla jaħdem kollox flimkien għall-ġid ta’ dawk li jħobbu ’l Alla, għal dawk li huma msejħin skont l-għan tiegħu. Għax lil min kien jafhom minn qabel, Alla wkoll ippredestinahom biex ikunu kkonformati mal-immaġni t’Ibnu, ħalli jkun hu l-primoġenitu fost ħafna aħwa. U ’l min ippredestinahom, lil dawn ukoll sejjaħ; ’l min sejjaħ, lil dawn ukoll iġġustifika; ’l min iġġustifika, lil dawn ukoll igglorifika” (Rumani 8:28-30).
Alla jippermetti l-ħażin jikber mat-tajjeb. Isawwab il-grazzja komuni tiegħu fuq kulħadd, xi ftit jew wisq, xi darba jew oħra, bħalma jtella’ x-xemx tiegħu u jibgħat ix-xita fuq il-ġust u l-inġust indiskriminatament. Alla ma jiġġudikax lill-ħażin apertament u immedjatament. Tana biss illustrazzjonijiet li ċertament għad ikun iġġudikat u kkundannat. Il-qagħda esterna tiegħek – soċjali, nazzjonali, fiżika, intellettwali, domestika – ma tirriflettix l-atteġġjament t’Alla lejk. Tista’ tkun fqir materjalment u għani spiritwalment.
Sħab il-patrijarka Ġobb, kif ukoll Ġobb innifsu, huma xi wħud minn dawk li provaw jinterpretaw il-providenza, u għarrielhom. Ħasbu u ddikjaraw bosta ħwejjeġ naiv u bla sens, filwaqt li Alla nnifsu jurina l-għan tiegħu, kemm hu mimli kumpassjoni u ħniena.
Alla jaħbi lilu nnifsu daqskemm jiżvela lilu nnifsu. Aktarx milli ninterpretaw il-providenza għarfa u inskrutabbli tiegħu, ejjew nifhmu u nobdu l-Kelma rivelata, għax il-ħwejjeġ moħbija huma tal-Mulej, imma l-ħwejjeġ mikxufa huma għalina u għal uliedna, biex inwettqu l-kelmiet kollha tal-liġi tiegħu (Dewteronomju 29:29). Nobdu, jiġri x’jiġri, anke jekk jirriżulta għall-ħsara u l-iżvantaġġ tagħna, għax nemmnu li “Alla jaqleb kollox għall-ġid ta’ dawk li jħobbuh” (Rumani 8:28), anke huma u għaddejjin mid-dlam.
Talba: “Missier u Alla suprem, tabilħaqq, il-pala tas-saram tħaffer ir-riżerva ta’ konfort ifnad, u tagħmel aktar wisa’ għall-konsolazzjoni tiegħek. Nagħrfu li wlied id-dawl jistgħu għal xi żmien jimxu fid-dalma, b’vistu u dieqa fuqhom, biss meta joħorġu minnha, jiddu iżjed u iżjed. Mela tħalliniex nitfixklu jew niskandalizzaw ruħna. Aħna nafdaw fik; għinna fin-nuqqas ta’ fiduċja tagħna fik. Ammen.”
Comments