“L-aħwa, jekk wieħed jinqabad f’xi trasgressjoni, intom l-ispiritwali jmisskom tirrestawraw lit-tali bi spirtu ta’ manswetudini. Biss ħares lilek innifsek, li ma tkunx imġarrab int ukoll. Erfgħu t-toqol ta’ xulxin, u hekk twettqu l-liġi ta’ Kristu. Għax jekk xi ħadd jidhirlu li hu xi ħaġa filwaqt li mhu xejn, jinganna lilu nnifsu. Kull wieħed imissu jittestja l-azzjonijiet tiegħu nnifsu, u mbagħad ikun jista’ jiftaħar bih innifsu biss, u mhux f’ħaddieħor. Għax kull wieħed imissu jerfa’ t-tagħbija tiegħu stess” (Galatin 5:1-4).
Ejjew noqogħdu attenti ferm fl-amministrazzjoni taċ-ċanfir. Jekk iċċanfar bl-addoċċ u bla sensittività aktar iżżarma milli tibni. Hemm mod u mod. Hija xi ħaġa evidenti, pereżempju, illi l-ħaddied l-ewwel isaħħan il-metall fil-forġa, jifformah, u wara jwebbsu b’ilma kiesaħ. Xi ħaġa hekk irridu nittrattaw ma’ ħuna li qed joffendi: l-ewwel saħħnu b’kommendazzjoni mistħoqqa għall-virtù u l-avvanz tiegħu, imbagħad tih bil-martell tat-twiddib sakemm tarah wasal fejn tixtiequ jasal. Dit-tattika mhix l-istess bħal “l-ewwel ixxarrabni mbagħad taħsilni,” għax fil-każ tagħna qed inżommu f’moħħna l-edifikazzjoni ta’ ħuna, mhux l-interessi personali.
Iċ-ċirkostanzi mhux dejjem huma ideali. Kultant lewma għall-għarrieda, malli d-dnub ikun kommess, irriformat lill-midneb, iżda l-għaġla mhux dejjem hi għaqlija. Meta l-ispirtu tal-bniedem hu sħun, u moħħu xurban bil-passjoni, aktar hemm ċans isawwat lill-Kristjan milli jisma’ l-parir tiegħu.
Iżda jekk m’hemm ebda probabbiltà ta’ ħin propizju, wara li tappella lill-Mulej għall-assistenza u suċċess, aħtaf l-opportunità preżenti. Fabius ikkonkwista billi ttratiena, iżda Ċesri għeleb l-għadu b’atakk fil-pront. Għalkemm ordinarjament mhix idea tajba tiżra’ l-qamħ meta jkun riħ qawwi, frattant il-bidwi jippreferi jiżra’ f’temp ikrah milli ma jiżra’ xejn.
Talba: “Agħtina s-sensibbiltà u l-għaqal, Mulej, biex nagħrfu meta, kif u fejn hu l-aħjar mod biex inwissu u nikkoreġu lil xulxin. Ħa jkun kliemna magħżul u sensittiv; ħa tkun l-attitudni tagħna umli u pożittiva. Fuq kollox, kulma nagħmlu ħa nieħdu ħsieb illi nagħmluh bl-imħabba ispirata minn imħabbtek lejna. F’ġieħ Ibnek Ġesù. Ammen.”
Comments