“Min se jifridna mill-imħabba ta’ Kristu? Tribulazzjoni jew diqa jew persekuzzjoni jew għaks jew għera jew periklu jew sejf? Bħalma hu miktub: ‘Minħabba fik niffaċċjaw il-mewt il-jum kollu; aħna stmati bħala nagħaġ għat-tbiċċir.’ Għall-kuntrarju, f’dawn il-ħwejjeġ kollha aħna aktar minn konkwistaturi permezz ta’ dak li ħabbna. Għax ninsab konvint illi la l-mewt, la l-ħajja, la l-anġli, la l-ħakkiema, la l-ħwejjeġ preżenti, la l-ħwejjeġ futuri, la s-setgħat, la l-għoli, la l-fond u lanqas kwalunkwe ħlejqa oħra mhi ħa tkun kapaċi tifridna mill-imħabba t’Alla li hi fi Kristu Ġesù Sidna” (Rumani 8:35-39).
M’aħniex bħal dawk li jparlaw fil-vojt u jgħidu illi Alla jista’ jhennik bit-tagħrif tas-salvazzjoni, biex jixkanak l-għada, jew jinkurunak bit-tjieba eterna tiegħu, biex jiċħadhielek il-ġimgħa d-dieħla.
It-tali idea hi dijametralment opposta għall-enfasi u l-ispirtu tat-Testment il-Ġdid. X’dottrina aktar patetika jista’ jkun hemm minn din: filli int fi stat ta’ ħajja, u filli tintrema’ fi stat ta’ mewt; filli protett bil-grazzja, u filli priv minnha; filli tinsab fl-Art Imwiegħda, u filli fix-xagħri; filli llum int abitazzjoni għal Alla, u filli għada ssir sinagoga satanika; filli għandek iċ-ċagħqa bajda tal-assoluzzjoni, u filli għada tirċievi l-ġebla sewda tal-kundanna; filli llum tinsab fi ħdan il-Feddej, u filli għadha ssib ruħek taħt il-granfi tax-xitan; filli int reċipjent ta’ ġieħ, u fid-daqqa u l-ħin issir reċipjent ta’ għadab; filli int il-magħżul, il-maħbub u l-imsejjaħ tal-Missier, u filli tisfa rroftat u mistmerr; filli għandek ismek imniżżel fi ktieb il-ħajja, u filli jkun imħassar.
Hekk tgħid id-dottrina Arminjana, intiża biex tħalli r-ruħ fi stat ta’ dubju u tregħid, itterter u tingħi fl-inċertezza. Minn dan ir-raġunament uman il-Kristjan imissu jwarrab. Is-salvazzjoni ma tiddependix fuqna nfusna, iżda fuq l-istabbiltà u l-infallibbiltà tal-għan t’Alla. Tistrieħ fuq l-effikaċja tar-riparazzjoni ta’ Kristu fuq il-Golgota. Tiddependi fuq it-tiġdid u s-setgħa tal-Ispirtu s-Santu li jopera fi qlubna sa jum il-fidwa finali.
Ftakar il-wegħda fuq fomm il-Feddej, “Jien nagħtihom il-ħajja eterna, u b’ebda mod ma jintilfu, qatt; ħadd mhu se jaħtafhomli minn idi. Missieri, li tahomli, hu ikbar minn kulħadd; ħadd ma jista’ jaħtafhom minn id il-Missier” (Ġwanni 10:28-29). Kif jafferma Pietru, aħna miżmumin, qisna bi gwarniġġjon, bis-setgħa omnipotenti t’Alla permezz tal-fidi għas-salvazzjoni li se tidher fl-aħħar waqt (1 Pietru 1:5).
Luteru jpoġġina fid-direzzjoni t-tajba. “L-Iskrittura kollha,” jgħarrafna, “timmira prinċipalment biex tagħtina ħalli ma niddubitawx, iżda aktarx tħajjarna nittamaw, tistedinna nafdaw, tikkmandana nemmnu, illi Alla hu Alla ħanin, ġeneruż, grazzjuż u paċenzjuż ma’ niesu.”
Talba: “X’ħażna ta’ ħniena ineżawribbli nsibu fik, Missierna! Għax il-muntanji jistgħu jitilqu u l-għoljiet jitheżhżu, iżda mħabbtek ma titħarrikx minn magħna, u lanqas il-patt tas-sliem tiegħek ma jiċċaqlaq. Grazzi talli ma ħallejtniex bejn ħalltejn fejn ninsabu miegħek. Ħa nkunu bieżla u ħerqana biex nimxu fil-mogħdijiet ġusti tiegħek, għas-sebħ tas-Salvatur tagħna, Ibnek Ġesù. Ammen.”
Comments