“Ibni, ħsiebek f’għerfi, mejjel widintek għal dehni. Biex tagħraf taħseb, u xofftejk iħarsu l-għerf. Għax xofftejn il-mara adultera iqattru l-għasel, u fommha oħla miż-żejt, iżda fl-aħħar tagħha morr daqs l-assenzju, daqs sejf b’żewġt ixfar jaqta’. Riġlejha neżlin lejn il-mewt; lejn Xeol jieħu l-mixi tagħha. Xejn ma tqisha triq il-ħajja, il-mixi tagħha ’l hawn u ’l hemm, u ma tafx fejn sejra. Isimgħuni, issa, uliedi, u minn kliem fommi la titwarrbux. Biegħed triqtek minnha, u tersaqx lejn bieb darha, biex fjur żgħożitek ma tagħtihx f’idejn ħaddieħor, u f’idejn wieħed kiefer sninek; biex il-barranin ma jimtlewx b’ġidek, u t-taħbit tiegħek imur f’dar ħaddieħor. U fl-aħħar tiegħek inti tokrob, meta laħmek u ġismek ikunu kkonsmati; u tgħid: ‘Kif bgħadt it-tagħlim, u kif qalbi setgħet tistmell it-twiddib, u ma smajtx kliem min kien jgħallimni, u lanqas tajt widen għal min kien iwissini! Għal ftit ma waqgħitx fuqi l-aqwa ħsara, f’nofs il-laqgħa u l-ġemgħa!’” (Proverbji 5:1-14).
Qiegħed tagħti widen għat-twissijiet ta’ nies li ġarrbu l-qerq, il-valenu u l-korruzzjoni tad-dinja? Wieħed narratur għarrafna kif darba waħħlu qanpiena fuq sikka perikoluża fl-oċean, qrib rotta ta’ navigazzjoni. Malli l-imwieġ jogħlew kienu jolqtu l-qanpiena, tibda ddoqq u hekk twissi l-baħħara resqin. F’okkażżjoni minnhom, xi pirati neħħew il-qanpiena u magħha allura neħħew it-twissija. Ma għaddewx bosta xhur qabel dawn l-istess sibbiena nkaljaw mas-sikka, u għerqu lkoll.
Kemm hawn fostna li jaraw x’jagħmlu biex isikktu leħen l-avvertiment! Jaraw kif iberrdu x-xhieda tal-kuxjenza, isoddu widnejhom għaċ-ċanfira ta’ ħaddieħor, biex wara li tiskot it-twissija, ma jdumux wisq ma jinnawfragaw mal-blat tat-tiġrib u jintilfu għal dejjem.
Jekk il-ġenituri tiegħek jew sħabek ixjeħ minnek għandhom l-esperjenza qarsa dwar x’toffri d-dinja, u qed jipprovaw jiftħulek għajnejk bil-quddiem, tkunx bla dehen u taħseb li qed itellfulek il-ġost tal-ħajja. Veru, id-dnub fih il-pjaċir tiegħu, iżda jgħaddi f’ħakka t’għajn; mill-banda l-oħra, il-paga mħallsa mid-dnub hi mewt eterna, u minn din id-dinja stess tibda dduq mill-imrar tagħha.
Pietru Walden, merkant ta’ Lyons, jara wieħed jaqa’ u jmut soptu fit-triq, u jmur id-dar u jindem. Ħajtu nbidlet mil-lejl għan-nhar, u saħansitra sar predikatur, il-missier u fondatur tal-moviment magħruf bħala l-Valdiżi. Hu dejjem profitabbli tirċievi twissija, anke jekk bla kliem, anke jekk mill-ħsara fuq ħaddieħor. Tara mewthom u timminda; taħseb x’ġara lilhom li jista’ faċilment jiġri lilek.
Taħsibx li tista’ tinbex il-lifgħa bla ma tingidem, jew tilgħab man-nar u ma tinħaraqx. Tbiegħed mela minn kull okkażżjoni jew kull persuna li tista’ tħajrek għal ħsibijiet u atti moqżieża. Ir-riedni jinsabu f’idejk: tersaqx lejn il-bieb tal-mara adultera. Biżżejjed għandek il-passjonijiet ta’ ġismek stess biex tissielet kontrihom. Titfax ħatab fuq in-nar li diġà qed jaqbad ġo fik.
Talba: “Mulej, meta tittestjana ftakar li aħna trab, għax l-ispirtu jrid iżda l-ġisem hu debboli. Kun magħna meta tgħaddina regolarment min-nar tal-prova, biex noħorġu msoffija u mhux imdewba. Issodana fuq il-blata unika tas-salvazzjoni tagħna; mexxina fil-mogħdija tal-ġustizzja, f’ġieħ ismek, triplament qaddis. Ammen.”
Comments