“Il-biża’ tal-Mulej hu l-bidu tat-tagħlim, iżda l-boloh jistmerru l-għerf u t-twiddib. Ibni, isma’ twiddib missierek u la titlaqx tagħlim ommok, għax ikunulek kuruna ħelwa ma’ rasek u ħannieqa madwar għonqok. Ibni, jekk iħajruk il-midinbin, tgħidilhomx ‘Iva.’ Jekk jgħidulek, ‘Ejja magħna, ħa nissajjaw biex noqtlu, nonsbu bil-moħbi għal min hu innoċenti; ħa nibilgħuhom ħajjin, bħal Xeol, u sħaħ bħal dawk li jinżlu fil-ħofra.’...Ibni, la timxix magħhom; warrab riġlejk minn triqathom” (Proverbji 1:7-12,15).
Ir-responsabbiltà tal-ulied hi sempliċi: it-tfal għandhom jobdu u jirrispettaw lill-ġenituri tagħhom. Mill-banda l-oħra, il-Mulej irid l-missirijiet u l-ommijiet iħarrġu lil uliedhom fi triqatu – vokazzjoni fiha nfisha!
Miskin għalih it-tifel ribelluż, li bi stinazzjoni jinjora l-ġenituri tiegħu u jgħaffeġ għal rasu. Minflok jilqa’ l-pariri siewja tagħhom, imsejsa fuq l-Iskrittura u l-esperjenza umana, iqishom tfixkil. Meta jitlaq għal rasu jkun qed jistieden illi jaqa’ fin-nasba tal-ħażen li tiswielu ħajtu stess.
Tfal, weġġħu ’ll-ġenituri tagħkom! Ħobbuhom u obduhom f’kollox sakemm kulma jikkmandawkom jaqbel mar-rieda t’Alla. Ikun għalikom l-isbaħ tiżjin tal-karattru tagħkom. Tikbru u ssiru l-irġiel u n-nisa kif iridkom il-Mulej, u tagħmlu unur lil dawk li ġabukom fid-dinja, u fuq kollox lill-Ħallieq tagħkom.
It-talb, it-twissijiet, l-appelli tal-ġenituri mhumiex fil-vojt. “Ibni, jekk tilqa’ kliemi u taħżen il-kmandamenti tiegħi ġo fik billi tagħti widen għall-għerf u tmejjel qalbek għall-fehma t-tajba, iva, jekk int issejjaħ id-dehen, u għall-fehma t-tajba int terfa’ leħnek, jekk tfittxu bħallikieku teżori moħbija, inti tifhem il-biża’ tal-Mulej, u ssib it-tagħrif t’Alla. Għax il-Mulej jagħti l-għerf u minn fommu ġej it-tagħrif u d-dehen. Hu jaħżen għerf kbir għan-nies sewwa; hu tarka għal min jimxi bl-onestà” (Proverbji 2:1-7).
Talba: “Missier, minnek tissemma kull familja fis-sema u fl-art. Agħti l-għerf u s-sensittività lill-ġenituri biex irabbu lil uliedhom fil-biża’ tiegħek u jgħallmuhom it-triq tas-sewwa. Lill-ulied żejjinhom b’ubbidjenza u sottomissjoni ġwejda, peress li int trid illi jitmexxew minn id il-ġenituri tagħhom. Rawwem fil-familja tiegħi spirtu ta’ mħabba, maħfra u sabar reċiproku.”
Comments