“Meta tiġu biex tidhru quddiemi, min talabkom dan mingħandkom, li tirfsu fil-btieħi tiegħi? La ġġibux iżjed offerti għalxejn; l-inċens tagħkom nistkerrhu, il-qamar ġdid u s-Sibt, u li ssejħu l-laqgħat. Jien ma niflaħx għall-ħażen magħqud mal-laqgħat solenni. L-ewwel tax-xhur tagħkom, u l-festi mwaqqtin tagħkom, ruħi tobgħodhom; dawn saru tagħbija għalija; għejjejt nerfagħhom. Għalhekk xħin tmiddu jdejkom biex titolbu, naħbi għajnejja minnkom; iva, meta tagħmlu ħafna talb, jien ma nismax. Idejkom mimlijin demm! Inħaslu, tnaddfu; neħħu l-ħażen ta’ għemilkom minn quddiem għajnejja; ieqfu mill-ħażen. Tgħallmu agħmlu t-tajjeb; fittxu l-ġustizzja; agħmlu hieni lill-imgħakkes; agħmlu ġustizzja lill-iltim; aqbżu għall-jedd tal-armla” (Isaija 1:11-17).
Ħafna huma n-nies reliġjużi li mhumiex milqugħin minn Alla. Għalkemm jippretendu li jagħrfuh, Alla jiddistakka ruħu minnhom. “Għall-ikkontaminati u l-miskredenti xejn mhu pur, anzi kemm il-moħħ kif ukoll il-kuxjenza tagħhom huma kkontaminati. Jikklejmjaw li jafu ’l Alla, imma b’azzjonijiethom jiċħduh. Huma detestabbli, diżubbidjenti, u diżapprovati għal kull att tajjeb” (Titu 1:15-16). Dan għaliex qalbhom hi iebsa, għadha mhijiex maqsuma bl-indiema.
L-atti reliġjużi tal-mitlufa – bħat-talb, tifħir u l-offerti tagħhom – huma abominazzjoni quddiem Alla. “Il-Mulej jistkerrah is-sagrifiċċji tal-ħżiena, iżda t-talb tan-nies retti l-għaxqa tiegħu” (Proverbji 15:8). Dan għaliex, aktar minn kollox, Alla jirrekjiedi minna qalbna.
David ukoll għaraf dan. Meta dineb, qallu: “Lilek ma jogħġbukx is-sagrifiċċji, altrimenti kont noffrihomlok...Is-sagrifiċċji lil Alla huma spirtu niedem: qalb maqsuma u sogħbiena, o Alla, int ma twarrabhiex” (Salmi 51:16-17).
Kemm hu insensat min jipprova jsikket il-kuxjenza tiegħu permezz ta’ atti jew riti reliġjużi. Ħa jkun jaf li Alla ma jaħmilx ir-reliġjon tiegħu. Mill-banda l-oħra, Alla jilqa’ n-nies retti u ġusti, lil dawk li bħat-tfal żgħar talbuh ħniena u jfittxu jgħixu skont Kelmtu. Xi ħsieb meraviljuż meta tagħraf li Alla jieħu gost bit-talb tagħhom. Il-Mulej jitgħaxxaq meta wliedu jmorru għandu bil-bżonnijiet u t-tifħir tagħhom.
Ħa nersqu bla biża’ quddiem it-tron tal-grazzja. Kristu qalagħlna aċċess; qegħdin nużawh? It-talb hu inċens ifuħ li jitla’ quddiem Alla. Hu l-arja li biha jgħixu l-fidili. Hu l-qannata li fiha jġibu l-ilma min-nixxiegħa. Hu l-barometru tar-ruħ, l-ikkordar tal-istrument, il-ħolqa li tgħaqqad l-art mas-sema. Hu l-ittra mibgħuta mit-tifel ċkejken lil Missieru tas-smewwiet.
Talba: “Mulej, nixtieq illi jkun jimportani biss mill-evalwazzjoni tiegħek dwari. B’ħaddieħor nista’ nidħaq u nagħti impressjoni li jien spiritwali. Iżda int Alla li tifli l-qlub u l-intenzjonijiet moħbija. Nitolbok, għal ġieħ ta’ Ibnek Ġesù, illi t-talb tiegħi jkun għaxqa quddiemek, ħiereġ minn qalb niedma u sinċiera. Ammen.”
Comments