“Min jgħasses fommu jippriżerva ħajtu, iżda min xofftejh jiftaħ beraħ, ħażin għalih. Min jistor il-ħtija, irid il-ħbubija, iżda min itenni l-ħtija, ibiegħed il-ħabib. Min jaqla’ l-qlajja jikxef sigrieti; għalhekk la tagħmilhiex ma’ min xofftejh dejjem miftuħa. La tqasqasx fuq il-qaddej ma’ sidu, li ma jisħikx u tinsab ħati” (Proverbji 13:3; 17:9; 20:19; 30:10).
Il-Kristjani jidinbu kontra xulxin u joffendu wieħed lill-ieħor. M’għandikx għalfejn tiskandalizza ruħek għal din l-istqarrija. Ħares lejk innifsek: int tammetti dgħufijietek, u kemm-il darba tidneb kontra Alla u l-proxxmu. Ma tifhimx, mela, li ħaddieħor hu wkoll midneb u dgħajjef bħalek? Xi darba jew oħra se nirfsu fuq il-kallu ta’ xulxin, inweġġgħu lil xulxin, u allura neħtieġu t-tolleranza reċiproka. Il-vokazzjoni tagħna tinkludi illi “b’kull umiltà u manswetudini, bil-paċenzja, nissaportu ’l xulxin fl-imħabba, u nħabirku ħalli nippriżervaw l-unità tal-Ispirtu fir-rabta tas-sliem” (Efesin 4:2-3).
Kull Kristjan għandu jfittex b’qalbu kollha l-ħbiberija tal-aħwa. “Finalment,” aħna istruwiti, “kunu lkoll armonjużi, simpatetiċi, tħobbu ’ll-aħwa, kumpassjonali u umli fil-moħħ. Tpattux ħażen għal ħażen jew insult għal insult, imma għall-kuntrarju, bierku, għax għal dan kontu msejħin, sabiex tirtu barka” (1 Pietru 3:8-9).
Id-dixxiplu matur jaf kif għandu jġib ruħu. Meta ħuh jidneb kontrih, ifittex b’ħiltu kollha r-rikonċiljazzjoni. Ma joqgħodx ixandar il-ħtija ta’ ħuh. Ma joqgħodx jiġri minn hawn għal hemm jirrepeti u jtenni l-iżbalji tal-ieħor. Jekk jagħmel hekk, dan ikun garanzija ta’ firda u dissens.
Xi dnub misħut hu t-tqasqis! L-akbar ħbieb tbiegħdu minn xulxin għaliex id-dnubiet tal-passat ma ndifnux.
Talba: “Missieri, għajn perenni ta’ kull tjieba u barka, fil-ħniena u l-fedeltà tiegħek lejja, ħarisli qalbi u lsieni, biex ma nkunx ħati ta’ tqasqis jew kwalunkwe nuqqas ieħor ta’ fommi. Agħmilni, minflok, strument ta’ sliem, biex fejn hemm suspetti u nuqqas ta’ qbil nintroduċi l-assigurazzjoni ta’ mħabbtek. F’isem Ibnek Ġesù nitolbok.”
Comments