“Hu u għaddej ra bniedem għami mit-twelid. Id-dixxipli tiegħu staqsewh, ‘Rabbi, min dineb, dar-raġel jew il-ġenituri tiegħu, biex twieled għami?’ Ġesù wieġeb, ‘La dan ma dineb u lanqas il-ġenituri tiegħu, iżda ġralu hekk sabiex ikunu esibiti l-opri t’Alla fih. Jeħtiġilna naħdmu l-opri ta’ min bagħatni sakemm għadu l-jum; ġej il-lejl meta ħadd ma jkun jista’ jaħdem. Filwaqt li jien fid-dinja, jien dawl id-dinja.’ Wara li qal dan, beżaq fl-art u għamel tikka tajn bil-bżieq, u applikalu t-tajn m’għajnejh. Qallu, ‘Mur inħasel fil-menqgħa ta’ Siloam’ (li tfisser Mibgħut). Għalhekk mar u nħasel, u ġie lura jara” (Ġwanni 9:1-7).
Kif ninterpreta l-providenza divina? Alla għandu ħakma u kontroll sħiħ fuq il-ħolqien tiegħu, fuq il-kbar u żgħar, maħturin u reprobati, anġli u demonji, ġnus u individwi, bhejjem u bnedmin. Isostni kollox u jmexxi kollox biex jintlaħaq l-għan komprensiv u ultimu tiegħu.
Imma kif nistgħu ninterpretawha? Kif se nfissru għalina nfusna dak li jiġrilna u dak li jiġri madwarna u fid-dinja? Nieħdu ftit eżempji u mbagħad minnhom niġbdu konklużjoni.
Meta xi ħadd isofri traġedja kbira ma jfissirx li hu neċessarjament eħżen mill-bqija. In-nies mitlufa jassumu wisq u għandhom bżonn ikunu kkoreġuti. Meta waqa’ t-torri ta’ Silwam qatgħuha li l-vittmi tat-traġedja kienu midinbin kbar. Bl-istess mod, inqisu l-katastrofi (tsunami fl-Asja), terremoti (normalment f’inħawi fejn it-tectonic plates iħokku ma’ xulxin), vulkani (Ħerkulaneum, Pompej), diżastri tal-ajru u l-baħar, bħalma kienet l-għarqa tat-Titanic. Mhux bilfors il-vittmi ta’ dawn l-avvenimenti koroh kienu agħar min-nies li tħallew ħajjin warajhom.
Meta kollox jiġi ‘kontrik’ taqax għall-konklużjoni li Alla abbandunak. Altru! Qis il-ġrajja ta’ David ippersegwitat, Ġobb milqut u mqaxqax. Cowper, il-poeta Ingliż, jgħid: “Wara providenza biċ-ċiera hemm wiċċ imbissem.”
Naraw ukoll kif id-dixxipli ħaddnu perspettiva dejqa wisq: hemm aktar minn żewġ alternattivi għala r-raġel twieled għama. M’għaddilhomx minn rashom li seta’ ġralu hekk biex sebħ il-Mulej ikun manifestat fih.
Talba: “Missier omnipotenti, nemmnu fil-providenza divina li biha tmexxi u taħkem fuq il-ħolqien tiegħek, iżżommu fl-eżistenza, u twassal kollox għall-għan aħħari tiegħu. Nafu wkoll li s-smewwiet u l-art huma mimlija bil-glorja tiegħek. Għallimna naraw għemilek kull fejn inħarsu, u nammiraw mogħdijietek, avolja sikwit ma nifhmuhomx.”
Comments