Adorazzjoni lil Alla

“Faħħru l-Mulej! Faħħru, o qaddejja tal-Mulej, faħħru isem il-Mulej. Ikun imbierek isem il-Mulej, minn issa u għal dejjem! Minn tlugħ ix-xemx sakemm tinżel, isem il-Mulej għandu jkun imfaħħar. Il-Mulej għoli fuq il-ġnus kollha, u l-glorja tiegħu fuq is-smewwiet. Min hu bħall-Mulej, Alla tagħna, li qiegħed fuq it-tron fil-għoli, li jħares ’l isfel biex jara l-ħwejjeġ li huma fis-smewwiet, u fuq l-art!” (Salmi 113:1-6).

Il-Monarka universali, imlibbes bil-maestà, jikkondixxendi lejna. Għalfejn is-sejħiet għall-qima huma tant ripetuti, imxerrda mas-Salterju kollu? M’għandniex għalfejn noffendu ruħna. Irridu min ifakkarna urġentement u kontinwament dwar il-privileġġ kbir u solenni tal-fidi tagħna: li nfaħħru u nbierku ’ll-Mulej, bla ma naqtgħu.

Kultant irridu nirdoppjaw jew anke nittriplaw is-sejħiet ħerqana għal dad-dover. It-tifħir hu ministeru eċċellenti, imma l-qalb, għalkemm imġedda, ġieli tqisu bħala piż, xi ħaġa superfluwa. Il-lingwa sikwit tinstab vejjikolu poveru għall-espressjoni, speċjalment meta r-ruħ titkebbes bil-gratitudni. Id-diskors hu adegwat għall-ġudizzju biered u t-taħdit kwotidjan tagħna; meta ħsibijietna jitgħabbew bit-tifħir dahar il-lingwa jinqasam.

Frattant huwa d-dmir morali tal-bnedmin kollha li jgħarrfu u jonoraw isem il-Mulej. Hu speċjalment is-sejħa tagħna l-mifdija, li sirna qaddejja, biex bil-kariga u l-professjoni tagħna ma nibqgħux siekta fuq dit-tema glorjuża, skont kif imħabbar minn qabel fil-profeti, illi minn tlugħ ix-xemx sal-għabex isem il-Mulej għad ikun imsebbaħ fost il-ġnus (Malakija 1:11).

Nistgħu ngħidu li aħna qaddejja voluntarji tal-Mulej? Erfajna l-madmad bħala voluntiera? Il-Mulej ma jridx merċenarji miegħu; ma jimponi ebda toqol fuqna ħlief dak li nerfgħu minn rajna.

Jista’ jkun li għandna qlub ilventi, diliġenti u lħiħa fil-kawża tagħna stess, imma mbagħad qlub kajmana, negliġenti u mħeddla f’xogħol il-Mulej? It-tempju dam biex reġa’ nbena, u safa traskurat, għax in-nies aktar kienu ffissati jibnu djar taċ-ċedru għalihom infushom. Il-Mulej ma jridx fetta għalih u l-kejk għalina, siegħa għalih u l-bqija tal-ġurnata għalina. Aħna l-possediment tiegħu. Infaħħruh fil-ħajja u l-mewt, fid-dieqa u l-ferħ.

Talba: “Int qaddis, qaddis, qaddis, o Sid Alla, l-Omnipotenti, dak li kien, u dak li hu, u dak li ġej. Nagħtuk glorja, unur u ringrazzjament, lilek bilqiegħda fuq it-tron, lilek li int minn dejjem għal dejjem. Naduraw lilek, il-Ħaj u s-sors ta’ kull ħajja. Denju int, is-Sid u Alla tagħna, li tirċievi l-glorja u l-unur u s-setgħa, għax int ħlaqt il-ħwejjeġ kollha, u minħabba l-volontà tiegħek nħolqu u jeżistu. Ammen.”

Comments

Qawwija fid-Dgħufija

“U mqar jekk l-evanġelju tagħna hu mgħotti, hu mgħotti biss għal dawk li qed jintilfu. Fil-każ tagħhom l-alla ta’ daż-żmien għema mħuħ il-miskredenti, sabiex ma jiddix fuqhom it-tidwil tal-evanġelju tal-glorja ta’ Kristu, li hu l-immaġni t’Alla. Għax mhux lilna nfusna nippritkaw, iżda ’l Kristu Ġesù bħala s-Sid, u aħna nfusna l-qaddejja tagħkom minħabba Ġesù. Għax Alla, li qal, ‘Ħa jiddi d-dawl mid-dlam,’ huwa dak li idda fi qlubna għat-tidwil tat-tagħrif tal-glorja t’Alla f’wiċċ Kristu. Imma għandna dat-teżor f’reċipjenti xaqqufin sabiex jintwera li din l-eċċessività tas-setgħa tappartieni għal Alla u mhijiex minna nfusna” (2 Korintin 4:3-7). Hemm kontinwità fil-fidi: ninsabu f’suċċessjoni ta’ demm martri. Ħa ngħaddu t-torċa minn id għall-oħra, minn ġenerazzjoni għall-oħra. Apparti l-fidili fil-knisja stabbilita, insibu n-Novatjani, id-Donatisti, il-Valdiżi (seklu 12), l-Albiġiżi (seklu 13), il-Lollardi (wara Wiklef fis-seklu erbatax), l-Aħwa Boħemjani (seklu 15), u l-Anabattis...

Lejk Nerfa' Għajnejja

“Lejk nerfa’ għajnejja, o int li tgħammar fis-smewwiet. Ara, bħalma għajnejn il-qaddejja jħarsu lejn id sidhom, u bħalma għajnejn il-qaddejja jħarsu lejn sidtha, hekk għajnejna jħarsu lejn il-Mulej, Alla tagħna, sakemm ikollu ħniena minna. Ħenn għalina, o Mulej, ħenn għalina, għax aħna mxebbgħin għall-aħħar bit-tgħajjir. Ruħna mxebbgħa żżejjed biż-żebliħ ta’ dawk li huma paxxuti, u bit-tgħajjir tal-imkabbrin” (Salmi 123:1-4). Huwa adatt li aħna nitolbu għar-rilif mill-istmellija. Sakemm għandna n-nifs, huwa preġju u żina għalina li nfittxu ’l Alla għall-għajnuna u gwida. Evidentement das-salm huwa t-tnegħida ta’ wieħed (ma’ fidili sħabu oħrajn) li jinsab fl-arena, f’sitwazzjoni iebsa, imkeskes minn nies ħżiena u mgħobbi bl-istmellija u d-disgust tagħhom. Imma Alla, li jippermetti d-dwejjaq jinvistana biex sikwit jgħammar magħna, jista’ jneħħih, isostnina taħtu jew jislet il-ġid minnu. Kif jista’ Alla jwarrab talb bħal dan, kif imlissen hawn? Alla kapaċi u difatti ...

Il-Mogħdrija

“Imma issa intom imisskom tneħħu dawn il-ħwejjeġ kollha: ir-rabja, l-għadab, il-malizzja, l-ikkalunnjar u diskors oxxen minn ħalqkom. Tigdbux lil xulxin, ladarba nżajtu l-bniedem il-qadim bil-prattiċi ħżiena tiegħu, u lbistu l-ġdid, li qed jiġġedded fit-tagħrif veru skont l-immaġni ta’ min ħalqu - tiġdid fejn m’hemmx distinzjoni bejn Grieg u Lhudi, ċirkonċiżjoni u inċirkonċiżjoni, barbaru, Skita, ilsir jew liberu, iżda Kristu hu kollox u f’kulħadd. Mela, bħala l-magħżulin t’Alla, qaddisin u maħbubin, ilbsu sentimenti ta’ mogħdrija, benevolenza, umiltà, manswetudini u paċenzja” (Kolossin 3:8-12). Il-beninnità hi l-ispirtu ta’ trattament favorevoli, jew il-prattika kostanti u abitwali ta’ azzjonijiet amikevoli u benevolenti. Hemm żewġ prinċipji ewlenin fil-kostituzzjoni umana, li jwettqu serriegħa bla waqfien għall-predominanza: l-egoiżmu u l-benevolenza, jew il-beninnità. L-egoiżmu jikkonċentra s-sentimenti, ix-xewqat u l-azzjonijiet kollha fuq il-promozzjoni tal-benesseri i...

PAUL MIZZI

Search This Blog