“Għemil il-bniedem quddiem il-Mulej, u jqis il-mixi kollu tiegħu. Għajnejn il-Mulej huma kullimkien, iħarsu lejn il-ħżiena u t-tajbin. Xeol u l-abbiss huma quddiem il-Mulej; kemm iktar mela qlub ulied il-bnedmin! Eħles lil dawk li huma meħudin għall-mewt, u għin lil dawk li se joqtluhom. Jekk int tgħid, ‘Ara, ma konniex nafu dan!’ Jaqaw dak li jiżen il-qlub ma jintebaħx b’dan? U min hu għassa ta’ ruħek ma jafx b’dan? U mhux lil kulħadd irodd dak li ħaqqu skont għemilu?” (Proverbji 5:21; 15:3,11; 24:11-12).
Ħa jkun imfaħħar Alla li jara kollox! Xejn ma hemm fis-sema u fl-art moħbi mill-ħarsa penetranti tiegħu.
Wieħed raġel mar jisraq iż-żara’ mill-għalqa ta’ sieħbu. Ħa miegħu liċ-ċkejken ibnu biex joqgħodlu għassa, biex fil-każ li jkun ġej xi ħadd, jagħmillu sinjal. Qabel ma qabeż fl-għalqa, ħares lejn ix-xellug u lejn il-lemin, xiref ukoll warajh u quddiemu, u billi ma ra ’l ħadd, medd idejh biex jimla’ ċ-ċurniena.
Kif kien se jmiss iż-żara’, ibnu għajjat, “Pa, hemm direzzjoni minnhom li bqajt ma ħaristx lejha!”
Il-missier issuppona li ġej xi ħadd, u ddomanda mingħand ibnu x’irid ifisser.
Ibnu qallu, “Insejt tħares ’il fuq!”
Milqut fil-kuxjenza, il-missier qabad lil ibnu minn idu u għaġġel lura d-dar biċ-ċurniena vojta.
“Għajnejn il-Mulej huma kullimkien.” It-trasgressur jistaħba, jitbiegħed mid-dawl għax jibża’, iżda kull mossa tiegħu inutli – id-dlam ma jistax jaħbih minn Alla. Bħalma Adam u Eva staħbew qalb is-siġar meta dinbu, hekk il-bniedem illum jistaħba mill-Ħallieq tiegħu minħabba ħżunitu. Fl-oxxenità tiegħu jikkonkludi li m’hemmx Alla, jew li l-Infern jinsab f’did-dinja. Oħrajn jistaħbew wara l-opri reliġjużi tagħhom, mingħalihom jistgħu jraqqgħu l-pannu bil-qargħa aħmar. Iżda ħa jkunu jafu lkoll il-bluha tagħhom: “Għajnejn il-Mulej huma kullimkien, iħarsu lejn il-ħżiena u t-tajbin.”
Filwaqt li dal-fatt jinstab ta’ twerwir għall-ħżiena, għalik – jekk inti ħrabt għall-kenn fi Kristu l-Feddej – għandu jkun faraġ tremend. Alla jafek. Jaf id-dwejjaq u l-ferħ tiegħek, il-biżgħat u l-bżonnijiet tiegħek. Iva, jaf ukoll meta tiżloq u tidneb kontrih. Minkejja dan kollu, jibqa’ jħobbok. “Jekk qalbna ċċanfarna, Alla hu akbar minn qalbna, u jaf kollox” (1 Ġwanni 3:20). Ħabib, ħares lejn il-Mulej li dejjem żamm għajnejh fuqek, u fittex mingħandu l-maħfra, ħalli jkollok il-biża’ tiegħu u tagħraf timxi fi triqatu.
Talba: “Għarbilni, o Mulej, u agħraf lil qalbi; m’hemm xejn li hu mistur jew sigriet għalik. Ġarrabni, mela, u kun af ħsibijieti. Ara jekk hemmx xi triq ħażina fija, u agħtini l-kuraġġ naċċetta l-qagħda tiegħi biex b’indiema ndur lejk għall-ħniena, kif ukoll għal riforma u tiġdid spiritwali. Mexxini fit-triq ta’ dejjem.”
Comments