“L-art maħruqa ssir għadira, u l-art għatxana għejjun ta’ ilma; u fejn kienu jgħammru x-xakalli, fejn kull wieħed minnhom kien jimtedd, il-ħaxix isir qasab u bordi. U jkun hemm triq ewlenija, triq li tissejjaħ it-triq il-qaddisa; l-imniġġsin ma jgħaddux minn fuqha; iżda tkun għal dawk li jimxu dik it-triq, u l-boloh ma jiġġerrewx fiha. L-ebda ljun ma jkun hemm, u l-ebda dbiba ħarxa ma titla’ minnha, u lanqas jinsabu hemm; iżda l-meħlusin jimxu fiha. U l-mifdijin tal-Mulej jerġgħu lura, u jidħlu Sijon b’għana; u ferħ dejjiem ikun fuq rashom, u jiksbu ferħ u hena, u n-niket u t-tnehid jaħarbu” (Isaija 35:7-10).
It-triq tal-qdusija hi tant dritta u ċara li l-iktar imħuħ sempliċi ma jitfixklux jekk isegwuha kontinwament. L-għorrief tad-dinja jgħawġu u jilwu sikwit fit-toroq tagħhom, u jagħmlu skoss żbalji ħoxnin. Jitilfu d-destinazzjoni tagħhom. Min jimxi skont id-dinja jbati minn vista qasira, u meta tagħżel it-triq tad-dinja twaddbek ġo widien mudlama. Il-Kristjan jaf li l-aħjar ħaġa hi dejjem it-twettiq ferrieħi tal-liġi t’Alla: hekk jibqa’ miexi fit-triq prinċipali, u jibqa’ aċċertat minn protezzjoni rjali. Jekk isofri fiżikament jew materjalment, jaf li qatt mhu se jġarrab telf spiritwali; anzi, ikun qed jaħżen għalih teżori fis-smewwiet.
Qatt tipprova tiżgiċċa minn diffikultà billi tigdeb, jew tagħmel xi att dubjuż, ikun x’ikun. Suq dejjem fil-linja tal-verità u l-integrità, u ma tiġġarrafx żgur. F’ħajjitna qatt m’għandna nistaħbew wara subgħajna. Kun ġust u tibżax. Imxi wara Ġesù Kristu u ħalli l-konsegwenzi f’idejh. Il-ħażin ma jissewwiex bil-ħażin. Il-metodu t’Alla hu dejjem l-aħjar metodu. Imxi fuq il-mudell smewwieti, avolja n-nies tgħaddik biż-żmien u tgħoddok b’iblah.
Talba: “Mulej, int Missier kumpassjonali; tagħder liċ-ċkejknin u maħbubin tiegħek. Mexxi l-qaddejja tiegħek u lili fi triq watja minħabba l-għedewwa tagħna. Tħallihomx jittrijonfaw fuqna; avolja joqtlu l-ġisem tagħna, ħajjitna hi tiegħek u int tqajjem lil ġisimna mill-mewt fl-aħħar jum. Ħalleluja lilek, mill-anġli u l-bnedmin!”
Comments