“Għax intom ma rċivejtux spirtu ta’ jasar ħalli terġgħu tibżgħu, iżda rċivejtu l-Ispirtu tal-adozzjoni, li bih ngħajtu, “Abba! Missier!” L-Ispirtu nnifsu jixhed flimkien mal-ispirtu tagħna illi aħna tfal t’Alla, u jekk tfal, allura werrieta wkoll – werrieta t’Alla, u werrieta flimkien ma’ Kristu, imbasta nbatu miegħu sabiex inkunu glorifikati wkoll miegħu. Nikkonsidra illi s-sofferenzi taż-żmien preżenti mhumiex denji jkunu pparagunati mal-glorja li dalwaqt se tkun irrivelata lilna” (Rumani 8:15-18).
L-evanġelju hu bxara tajba “ta’ ferħ kbir.” Il-ferħ hu s-sigriet tiegħi bħala Kristjan, imma hu sigriet tant massiv u tant infettiv illi impossibbli nżommu mistur. Wieħed mill-fatti l-aktar bizzarri, lil hinn mill-fehma tiegħi, hu proprjament meta niltaqa’ ma’ xi ħadd illi jikklejmja li jagħraf ’l Alla, u frattant qisu ssellef wiċċ Laskri permanentament – kważi jiddispjaċih li ltaqa’ m’Alla. L-assenza virtwali tal-ferħ iġġegħilni nissuspetta li t-tali mingħalih emmen l-evanġelju mentri qed jemmen f’aħbar traġika u katastrofika.
Ninsab ferħan, mhux għax bħan-nagħma ndeffes rasi fir-ramel u nilgħabha taparsi l-inġustizzja jew it-tbatija ma jeżistux. Ferħan għax ninsab konvint illi l-agħar atroċità umana mhijiex ultima. Kapaċi nifraħ mhux billi naħbi d-dmugħ, imma għax nafferma li l-qabar, darba proprjetà ta’ Ġużeppi minn Arimatea, huwa vojt. Nafferma fatti li huma aktar profondi mid-dmugħ.
Il-Missier, li jifraħ għal kull ingrat u prodgu li jdur lejh, għażilna għall-ferħ. It-traġitt jista’ jkun iebes. Jiddomanda l-għaraq u d-demm, imma fil-medda tiegħu u sa tmiemu, huwa vjaġġ ta’ ferħ. Jekk il-ħajja hi proverbjalment “wied ta’ dmugħ,” il-grazzja timmotivana biex inkredibbilment nibku bil-ferħ.
Talba: “Nistqarru, Mulej setgħani, illi nifhmu naqra waħda mill-pjan misterjuż tiegħek. Qed tiżvolġih quddiemna u saħansitra bina. Qed tifformana u tħejjina għall-glorja eterna. Tħalliniex nitgerrxu mit-trattamenti tiegħek magħna, kultant iebsa, għax il-Ġenna narawha aktar ċara mill-priżma tad-dmugħ.”
Comments