“Saħansitra Xmun innifsu emmen, u wara li tgħammed żamm fil-qrib ma’ Filippu; u billi osserva sinjali u setgħat mirakolużi kbar jiġru quddiemu, baqa’ mnixxef. Meta l-appostli f’Ġerusalemm semgħu illi s-Samarija laqgħet kelmet Alla, bagħtulhom lil Pietru u ’l Ġwanni, li niżlu u talbu għalihom ħalli jirċievu l-Ispirtu s-Santu, għax kien għadu ma waqa’ fuq ħadd minnhom, imma biss kienu mgħammda f’isem is-Sid Ġesù. Imbagħad poġġew idejhom fuqhom, u rċevew l-Ispirtu s-Santu. Xħin Xmun ra illi l-Ispirtu kien mogħti bit-tqegħid t’idejn l-appostli, offrielhom il-flus. ‘Agħtu lili wkoll din l-abbiltà,’ qal, ‘sabiex fuq min inpoġġi jdejja jirċievi l-Ispirtu s-Santu.’ Imma Pietru wieġbu, ‘Ħa tmur il-fidda tiegħek għat-telfien miegħek, għax issupponejt li stajt tipprokura l-għotja t’Alla bil-flus! M’għandek la parti u lanqas sehem f’dil-materja, għax qalbek mhix sewwa quddiem Alla. Indem mela minn dal-ħażen tiegħek, u agħmel petizzjoni lis-Sid ħalli, jekk inhu possibbli, tinħafirlek l-intenzjoni ta’ qalbek. Għax narak li tinsab fil-marrara tal-imrar u fir-rabta tal-inikwità.’ Imbagħad Xmun wieġeb, ‘Agħmlu petizzjoni intom infuskom għalija lis-Sid, ħalli xejn ma jiġi fuqi mill-ħwejjeġ li għidtu’” (Atti 8:13-24).
Minn dil-ġrajja nintebħu faċilment illi wieħed jista’ “jemmen” u jibqa’ wild ix-xitan; imma min jemmen b’qalbu kollha jsir wild t’Alla.
Temmen f’xiex, jew aħjar, f’min? Irridu nifhmu illi l-fidi ma ssalvaniex minnha nfisha. Hi l-mezz strumentali; biha ningħaqdu mas-Salvatur, Ġesù. Permezz tagħha naqbdu u napplikaw għalina nfusna lil Kristu, bil-ġustizzja u l-merti tiegħu. Bih u bih biss aħna dikjarati ġusti quddiem Alla, l-Imħallef tagħna.
Id żgħira u dgħajfa, jekk kapaċi tressaq l-ikel għall-ħalq, twettaq dmirha għan-nutriment tal-ġisem daqs id ta’ saħħa eċċezzjonali, għax mhijiex is-saħħa fl-id iżda t-tjieba tal-ikel illi jsostni l-ġisem. Inkwantu s-salvazzjoni, hix fidi ferma jew debboli, irrelevanti; l-aqwa li tittermina f’Bin Alla, li miet għal dnubietna u tqajjem għall-ġustifikazzjoni tagħna.
Temmen, ovvjament u pekuljarment, f’Redentur li qatt ma rajtu. “Imberkin dawk li ma rawx u frattant emmnu” (Ġwanni 20:29). Hi l-kariga partikolari u speċjali tal-fidi illi temmen dak li ma tarax, u l-premju tal-fidi għad ikun illi tara dak li bħalissa temmen fih.
Talba: “Ma rridx nemmen, o Mulej Alla, biex nagħmel bħal ħaddieħor, jew biex naqbel mal-konvenzjoni jew il-kultura. Irrid nemmen għax inkun persważ mill-evidenza li tajtna, konvint mill-Ispirtu tiegħek biex niġri għall-kenn fik, ħalli teħlisni mill-għadab li ġej. Agħmel illi l-fidi tiegħi tkun dejjem attiva, taħdem bl-imħabba u sottomessa għar-rieda sovrana tiegħek. F’isem Ibnek stess. Ammen.”
Comments