“Imma xħin opponewh u saru abbużivi, farfar ilbiesu bi protesta u qalilhom, ‘Demmkom fuq raskom stess! Jien innoċenti. Minn issa ’l quddiem se mmur għand il-Ġentili.’ Imbagħad telaq minn hemm u mar fid-dar ta’ wieħed jismu Titju Ġustu, li kien jirreveri ’l Alla; daru kienet tmiss mas-sinagoga. Krispu, il-kap tas-sinagoga, emmen fis-Sid ma’ daru kollha; u qabda mill-Korintin, li semgħu ’l Pawlu, emmnu u tgħammdu.Darba minnhom, billejl, is-Sid qal lil Pawlu f’apparizzjoni, ‘Tibżax aktar, iżda kompli tkellem u tiskotx, għax jien ninsab miegħek, u ħadd mhu se jaħbat għalik u jimmaltrattak, għax għandi ħafna nies f’dil-belt.’ Għalhekk ssetilja hemm sena u sitt xhur, jgħallem fosthom kelmet Alla” (Atti 18:6-11).
Il-ġnus jistgħu jixxewxu kontra s-Sultan tas-slaten, iżda finalment tiegħu tgħaddi. Dan narawh kontinwament imfisser f’diversi ġrajjiet irrekordjati fl-Iskrittura. Sakemm il-Mulej kellu ċertu xogħol għal Pawlu x’jagħmel fil-belt ta’ Korintu, il-furja tal-folol kienet imrażżna. Il-Lhud, bħas-soltu, opponew u żebilħu t-tagħlim appostoliku. Xorta waħda ma setgħux ixejnu x-xandir unzjonat u setgħan tal-evanġelju. Lanqas ma kienu kapaċi jżommu lil nies oħra milli jikkonvertu.
Indubjament, Alla jeżerċita qawwa sovrana fuq l-imħuħ l-aktar vjolenti. Anke l-għadab tal-bniedem ifaħħru. Però jesibixxi t-tjieba tiegħu l-iżjed meta jliġġem ir-rabja tal-għedewwa tiegħu. “Bil-kobor ta’ driegħek ikunu siekta bħal ġebla, sakemm niesek jaqsmu minn naħa għall-oħra, o Mulej, sakemm jgħaddi l-poplu tiegħek, li int ksibt” (Esodu 15:16).
Mhuwiex lok illi tħalli n-nies twerwrek jew tbeżżgħek, mela, meta taf li qed taqdi dmirek. Issokta fuq xogħlok; mantni kuxjenza tajba, u ħalli l-għadu jgħażżaż snienu. L-avversarji, avolja feroċi, eventwalment isiru bħal qasba mġelġla u ftila ddaħħan. Fidi kuraġġjuża f’Alla tiknes il-biża’ fil-ġenb, bħalma ġgant inaddaf kamra mill-għanqbut. Ladarba Alla hu favurina, ħadd ma jista’ jmissna. Ebda opponent, sew jekk uman jew inkella demoniku, mhu kapaċi jagħmlilna l-ħsara, jekk ma jippermettilux il-Mulej. B’kelma waħda x-xitan jaħrab minnu; mhuwiex kapaċi allura jikkontrolla l-ministri tad-dlam u jżommhom taħt it-treġija tiegħu? Ironikament abbli diġà qed jibżgħu minnek iżjed milli tinsab imgerrex minnhom int.
Għalhekk, kompli mmarċja! Kompli avvanza f’territorju ġdid. L-Art Imwiegħda hi tiegħek. Tissetiljax għal eżistenza medjokri b’fidi ċkejkna. Tagħmilhiex ta’ tallab meta int prinċep. U abbli fejn tistenna li ssib l-għedewwa ssib il-ħbieb.
Talba: “Jiena nħobbok, Mulejja, għax int qawwieti. Int waħdek il-blata u l-fortizza; int u jien nifformaw maġġoranza kontra d-dinja. Ħallini nistkenn fik; kun int it-tarka tiegħi u l-qarn tas-salvazzjoni tiegħi. Int it-torri għoli tiegħi, is-sur setgħan li qatt ma jċedi. Ħallelujah! Fik nittama jien. Ammen.”
Comments