L-ajkla dritt taret, laqqgħet lill-annimali u tathom l-opoportunità biex isemmgħu l-ilmenti tagħhom. Il-kelb taċ-ċiwawwa ilmenta illi għalkemm jaf jinbaħ ma kien ċkejken wisq u mhux kapaċi jiġri daqs il-kelb tal-kaċċa, u allura ma kellu ebda ċans jaqbad xi gamiema. L-iljun esprima ruħu hekk: “Kieku għandi l-makakkerija tal-volpi, ma jkollix għalfejn nilmenta.” U l-volpi qal: “ U kieku għandi l-qawwa u l-ġmiel tal-iljun, ma kontx nipprotesta.” Is-serduq qal: “Kieku kapaċi ntir bħall-ħamiem, ma tisimgħunix ingorr.” U l-ħamiema qalet: “Kieku għandi r-rix imlewwen bħal tas-serduq, ma kontx ningħaqad f’dan l-irvell.” L-awrata qalet: “U jien, kieku kapaċi nimxi fil-foresta bħall-ors u l-fenek, kont inkun kuntenta.”
L-ajkla, kif rat hekk, ħadet paċenzja bihom, u fissritilhom illi jaqblilhom ikunu kuntenti kif inhuma. “Aċċettaw il-qagħda tagħkom,” qaltilhom, “u timitawx il-moħħ imqalleb, kburi u ambizzjuż tal-umanità.”
L-annimali ħarsu lejn xulxin imbellha, u mal-ewwel intebħu b’liema għerf kellmithom l-ajkla. Kulħadd mar għal rasu: il-volpi kien ferħan għax hu volpi, mentri s-serduq kien ferħan għax hu serduq.
L-ajkla ma kellha xejn x’tirrapporta lil Ġove ħlief illi kien hemm żvista ċkejkna, iżda fil-frattemp kollox ġie rranġat b’wiċċ il-ġid.
Comments