“Imma aħna jmissna dejjem nirringrazzjaw ’l Alla għalikom, l-aħwa maħbubin mis-Sid, għax Alla għażilkom mill-bidu għas-salvazzjoni permezz tas-santifikazzjoni tal-Ispirtu u fidi fil-verità, li għaliha sejħilkom permezz tal-evanġelju tagħna, għall-otteniment tal-glorja ta’ Sidna Ġesù Kristu. Hekk mela, l-aħwa, ieqfu sħiħ, u aqbdu sod mat-tradizzjonijiet li kontu mgħallmin, sew jekk bid-diskors jew b’epistola tagħna. M’hemmx li Sidna Ġesù Kristu nnifsu u Alla Missierna, li ħabbna u tana faraġ etern u tama tajba bil-grazzja tiegħu, jinkuraġġixxi qlubkom u jistabbilikom f’kull opra u kelma tajba” (2 Tessalonkin 2:13-17).
Dħalt f’saltnet il-Mulej, jew għadek barra? Smajt biss, bla ma ħadt azzjoni? Irraġuna hekk ma’ ruħek: jien nemmen l-evanġelju, allura jien magħdud ġust quddiem Alla bil-merti t’Ibnu, li ħallas il-penali minfloki. Jien ġustifikat, allura għandi bażi soda biex inkun santifikat għal Alla tiegħi. Jien santifikat, allura naf li jien imsejjaħ. Jien imsejjaħ, allura bilfors jien magħżul. Jien magħżul, allura fiż-żgur se nkun mal-qaddisin fil-Ġenna, fit-tgawdija ineffabbli t’Alla l-Imbierek. X’konfort issetiljat ta’ ferħ u hena! Għaxart elef demonju ma jistgħu qatt iriegħdu l-għan favorevoli t’Alla lejja.
Nafu kif l-appostli u l-profeti jħambqu fuq il-predestinazzjoni; hi pilastru innegabbli fit-tempju t’Alla. Hi s-sors ta’ barkiet innumerabbli; nistgħu ngħidu li tixbah lix-xemx. Ma nistgħux inħarsu fissi lejn ix-xemx fl-appan tagħha – jekk nissograw niċċassaw lejha, nagħmew. Insiru nafuha biss bl-imrieżaq, id-dawl u s-sħana tagħha. L-għażla tal-Missier hi x-xemx għalina, li lanqas għajnejn l-ajkli ma jikkonċentraw fuqha. Frattant nistgħu nsibu l-pożizzjoni tagħna, aħniex magħżula jew le, billi nħossu s-sħana tas-sejħa tagħna, id-dawl tal-illuminazzjoni, u r-raġġi tal-opri t-tajba maħdumin fina.
Il-punt huwa dan. Alla ffissa t-tmiem mill-bidu, imma t-tmiem jintlaħaq bl-użu għaqli tal-mezzi provduti minnu stess. Jekk nittraskura l-mezzi u nibqa’ nittratieni, allura dan sinjal illi Alla ma għażilnix għas-salvazzjoni. Imma tiskopri, b’għajb u turment għalik innifsek, illi ma ħallielek l-ebda skuża, għax poġġa l-mezzi għad-dispożizzjoni tiegħek. “Indmu, u emmnu fl-evanġelju!” appella r-Rajjes tas-salvazzjoni (Mark 1:15). “Issa ż-żmien aċċettabbli, issa jum is-salvazzjoni,” ifakkarna r-rasul tiegħu (2 Korintin 6:2).
Talba: “Missier, nitolbuk biex ma nittraskurawx milli mmantnu lilna nfusna fil-grazzja tiegħek. Il-ħajja eterna ngawduha minħabba l-għażla divina, hi mwiegħda fis-sejħa effettiva, issiġillata fil-ġustifikazzjoni tagħna, u posseduta kompletament fil-glorifikazzjoni tagħna. Quddiem din il-panorama, qanqal fina sens ta’ qima lejk u gratitudni profonda, filwaqt li nkunu bieżla fis-servizz tagħna lejk.”
Comments