Il-Parabbola tal-Imsiemer

F’pajjiż orjentali għex għoġol li kien jitlagħlu malajr u jaqbad ifajjar biż-żewġ fejn ġie ġie. Ommu, baqra bil-għaqal u mdorrija xxidd il-madmad, iddispjaċieha għall-mewt illi ngħatalha iben hekk vergonjuż. Biex tgħinu tatu parir.
“Kull darba li tħoss it-tempra tiela’,” qaltlu, “aqbad dan il-martell u l-landa msiemer, u mur sammar musmar wieħed ma’ dik il-balluta f’nofs il-bur.”
Binha għoġbitu l-idea, u hekk għamel. Kull darba li jħoss d-demm tiela’ għal rasu, jaqbad u jagħmel kif qaltlu t-twajba ommu. L-ewwel xahar sammar mas-sittin musmar, it-tieni xahar erbgħin, it-tielet xahar għoxrin. Beda jinnota illi eħfef għalih ma jirrabjax milli joqgħod jinqala’ biex isammar il-musmar. Difatti fir-raba’ xahar sammar ħames imsiemer biss. Billi fil-ħames xahar ma rrabja qatt, ommu ssuġġerietlu biex kull ġurnata li tgħaddi, jekk jibqa’ bla ma jirrabja, imur jaqla’ musmar wieħed. L-għoġol obda, u waslet dik il-ġurnata meta l-imsiemer qalagħhom kollha.
Kollu eċċitat, l-għoġol sejjaħ lil ommu biex tara l-bravura tiegħu.
“Prosit għalik, ibni,” qaltlu. “Għad ikun fik barri gwapp. Biss ftakar fil-ħsara li tħalli r-rabja: ħares lejn dil-povra siġra. Fejn qabel kif fiha għaxqa, tħaddar mifruxa, issa qiegħda tmut, ħtija tat-toqob illi l-imsiemer taqqbu fiz-zokk tagħha.”

Comments

Qawwija fid-Dgħufija

“U mqar jekk l-evanġelju tagħna hu mgħotti, hu mgħotti biss għal dawk li qed jintilfu. Fil-każ tagħhom l-alla ta’ daż-żmien għema mħuħ il-miskredenti, sabiex ma jiddix fuqhom it-tidwil tal-evanġelju tal-glorja ta’ Kristu, li hu l-immaġni t’Alla. Għax mhux lilna nfusna nippritkaw, iżda ’l Kristu Ġesù bħala s-Sid, u aħna nfusna l-qaddejja tagħkom minħabba Ġesù. Għax Alla, li qal, ‘Ħa jiddi d-dawl mid-dlam,’ huwa dak li idda fi qlubna għat-tidwil tat-tagħrif tal-glorja t’Alla f’wiċċ Kristu. Imma għandna dat-teżor f’reċipjenti xaqqufin sabiex jintwera li din l-eċċessività tas-setgħa tappartieni għal Alla u mhijiex minna nfusna” (2 Korintin 4:3-7). Hemm kontinwità fil-fidi: ninsabu f’suċċessjoni ta’ demm martri. Ħa ngħaddu t-torċa minn id għall-oħra, minn ġenerazzjoni għall-oħra. Apparti l-fidili fil-knisja stabbilita, insibu n-Novatjani, id-Donatisti, il-Valdiżi (seklu 12), l-Albiġiżi (seklu 13), il-Lollardi (wara Wiklef fis-seklu erbatax), l-Aħwa Boħemjani (seklu 15), u l-Anabattis...

Il-Mogħdrija

“Imma issa intom imisskom tneħħu dawn il-ħwejjeġ kollha: ir-rabja, l-għadab, il-malizzja, l-ikkalunnjar u diskors oxxen minn ħalqkom. Tigdbux lil xulxin, ladarba nżajtu l-bniedem il-qadim bil-prattiċi ħżiena tiegħu, u lbistu l-ġdid, li qed jiġġedded fit-tagħrif veru skont l-immaġni ta’ min ħalqu - tiġdid fejn m’hemmx distinzjoni bejn Grieg u Lhudi, ċirkonċiżjoni u inċirkonċiżjoni, barbaru, Skita, ilsir jew liberu, iżda Kristu hu kollox u f’kulħadd. Mela, bħala l-magħżulin t’Alla, qaddisin u maħbubin, ilbsu sentimenti ta’ mogħdrija, benevolenza, umiltà, manswetudini u paċenzja” (Kolossin 3:8-12). Il-beninnità hi l-ispirtu ta’ trattament favorevoli, jew il-prattika kostanti u abitwali ta’ azzjonijiet amikevoli u benevolenti. Hemm żewġ prinċipji ewlenin fil-kostituzzjoni umana, li jwettqu serriegħa bla waqfien għall-predominanza: l-egoiżmu u l-benevolenza, jew il-beninnità. L-egoiżmu jikkonċentra s-sentimenti, ix-xewqat u l-azzjonijiet kollha fuq il-promozzjoni tal-benesseri i...

Lejk Nerfa' Għajnejja

“Lejk nerfa’ għajnejja, o int li tgħammar fis-smewwiet. Ara, bħalma għajnejn il-qaddejja jħarsu lejn id sidhom, u bħalma għajnejn il-qaddejja jħarsu lejn sidtha, hekk għajnejna jħarsu lejn il-Mulej, Alla tagħna, sakemm ikollu ħniena minna. Ħenn għalina, o Mulej, ħenn għalina, għax aħna mxebbgħin għall-aħħar bit-tgħajjir. Ruħna mxebbgħa żżejjed biż-żebliħ ta’ dawk li huma paxxuti, u bit-tgħajjir tal-imkabbrin” (Salmi 123:1-4). Huwa adatt li aħna nitolbu għar-rilif mill-istmellija. Sakemm għandna n-nifs, huwa preġju u żina għalina li nfittxu ’l Alla għall-għajnuna u gwida. Evidentement das-salm huwa t-tnegħida ta’ wieħed (ma’ fidili sħabu oħrajn) li jinsab fl-arena, f’sitwazzjoni iebsa, imkeskes minn nies ħżiena u mgħobbi bl-istmellija u d-disgust tagħhom. Imma Alla, li jippermetti d-dwejjaq jinvistana biex sikwit jgħammar magħna, jista’ jneħħih, isostnina taħtu jew jislet il-ġid minnu. Kif jista’ Alla jwarrab talb bħal dan, kif imlissen hawn? Alla kapaċi u difatti ...

PAUL MIZZI

Search This Blog