“Huma u ħerġin, in-nies appellawlhom biex dawn il-ħwejjeġ jerġgħu jgħidulhomlhom is-Sibt ta’ wara. Meta ġiet xolta il-laqgħa tas-sinagoga, qabda mil-Lhud u mill-prożeliti li kienu jirreveru ’l Alla segwew lil Pawlu u ’l Barnaba, li tkellmu magħhom u pperswadewhom biex jissoktaw fil-grazzja t’Alla. Is-Sibt ta’ wara kważi l-belt kollha nġabret biex tisma’ kelmet Alla. Imma xħin il-Lhud raw il-folol, imtlew bil-ġelosija u bdew jikkontradixxu l-ħwejjeġ mitkellma minn Pawlu, u jivvilifikaw. Imbagħad Pawlu u Barnaba tkellmu bi qlubija u qalu, “Kien neċessarju li kelmet Alla tkun mitkellma lilkom l-ewwel. Ladarba tirroftawha u tiġġudikaw lilkom infuskom bħala mhux denji tal-ħajja eterna, issa se nduru lejn il-Ġentili. Għax hekk ikkmandana s-Sid: ‘Qegħidtek bħala dawl għall-Ġentili biex twassal is-salvazzjoni sa truf l-art.” Meta l-Ġentili semgħu dan, ferħu u gglorifikaw kelmet is-Sid; u emmnu dawk kollha li kienu maħturin għall-ħajja eterna. Kelmet is-Sid kienet qed tkun imferrxa matul ir-reġjun kollu” (Atti 13:42-48).
Il-grazzja u l-glorja ftit differenti minn xulxin: il-grazzja hi ż-żerriegħa, il-glorja hi l-fjura tagħha. Il-grazzja hi l-glorja militanti; il-glorja hi l-grazzja trijonfanti. Huwa xogħol wisq akbar u iżjed meraviljuż illi Alla jġibna minn stat ta’ telfien għal stat ta’ grazzja miegħu, milli minn stat ta’ grazzja jwasssalna għall-istat tal-glorja fil-Ġenna; għax id-dnub hu wisq aktar imbiegħed mill-grazzja milli l-grazzja mill-glorja.
Daparti tagħna, aktar ma ngħumu fil-grazzja aktar napprezzawha u nirrispondu għaliha. Bħalma x-xmajjar, aktar ma joqorbu lejn l-oċean, aktar joktru fl-ilmijiet, u jgħaġġlu fil-kurrent tagħhom, hekk il-grazzja tnixxi aktar liberament u b’enerġija aktar ma noqorbu lejn l-oċean tal-glorja.
Tippossiedi dil-grazzja? Il-kobor fil-grazzja hu l-aħjar evidenza dwar il-ġenwinità tagħha fik; ħwejjeġ bla ħajja ma jikbrux. Issa l-grazzja timmatura, tiżviluppa u tibdlek hekk kif l-imħabba lejn il-Kelma t’Alla tikber f’qalbek; u l-aħjar manjiera ta’ kobor huwa li tiċkien f’għajnejk stess.
Ħsieb aħħari: il-grazzja hi salvivika, fiha nfisha. Jekk tkun dgħajfa timmotivana biex nagħmlu ċerti ħwejjeġ għall-Mulej, iżda hi biss grazzja qawwija li twassalna biex immutu għall-Mulej. Frattant ejjew neżerċitaw ruħna biex “nissoktaw fil-grazzja t’Alla.”
Talba: “Mulej, inkun agħar minn bhima jekk nirgħeb għall-possedimenti materjali u nibqa’ priv mill-grazzja tiegħek. Eħlisni mill-ġenn u l-bluha; agħtini qalb li tfittxek u tixxennaq għalik, għax fil-preżenza tiegħek hemm il-milja tal-ħajja u l-appan ta’ kull feliċità. Għaġġel agħmel dan, f’ġieħ ismek il-kbir. Ammen.”
Comments