“‘Tħallux qalbkom tkun imħawda. Afdaw f’Alla; afdaw ukoll fija. F’dar Missieri hemm ħafna kmamar; kieku ma kienx hekk kont ngħidilkom. Jien sejjer nipprepara post għalikom. U jekk immur u nipprepara post għalikom, nerġa’ niġi u għad nirċevikom għandi nnifsi, sabiex fejn inkun jien, intom tkunu wkoll. Fejn sejjer jien tafuha t-triq għal hemm.’ Tumas qallu, ‘Ja Sid, ma nafux fejn sejjer, allura kif nistgħu nkunu nafu t-triq?’ Ġesù wieġbu, ‘Jien hu t-triq u l-verità u l-ħajja. Ħadd ma jiġi għand il-Missier ħlief permezz tiegħi’ (Ġwanni 14:1-6).
Il-barka perfetta tal-fidili fil-Ġenna tkun tikkonsisti fl-immunità u ħelsien perfett minn kull ħażen u l-miżerja tiegħu; u fit-tgawdija sħiħa t’Alla, it-tajjeb ewlieni tagħna. F’dik il-belt, Ġerusalemm smewwitija, ngħammru fil-preżenza t’Alla, għax “it-tron t’Alla u tal-Ħaruf se jkun fil-belt, u l-qaddejja tiegħu se jaqduh. Għad jaraw ’il wiċċu, u ismu jkun fuq ġbienhom” (Rivelazzjoni 22:2-3). Kultant fuq l-art nesperjenzaw l-hena ta’ qima ġenwina t’Alla, u nirrealizzaw li hi l-ogħla feliċità tagħna illi nagħtuh glorja. Iżda fl-istat etern tagħna dal-ferħ ikun multiplikat u nagħrfu t-twettiq ta’ dak għal xiex konna maħluqa.
L-iprem hena tagħna tkun illi naraw lill-Mulej innifsu u nkunu miegħu għal dejjem. Iż-żenit ta’ barkiet innumerabbli fil-Ġenna tintlaħaq fl-istqarrija, “Għad jaraw ’il wiċċu.” Meta nħarsu f’wiċċ il-Mulej u hu jħares lejna b’imħabba infinita, naraw fih it-twettiq ta’ kulma nafu li hu tajjeb, sewwa u desiderabbli fl-univers. Inkunu nafu x’inhi mħabba, sliem u feliċità perfetta. Insiru nafu s-sinifikat tal-verità u l-ġustizzja, qdusija u għerf, tjieba u qawwa, glorja u sbuħija. Imbagħad nifhmu perfettament dak li nkiteb, “Fil-preżenza tiegħek hemm il-milja tal-ferħ, fuq lemintek hemm għaxqiet għal dejjem” (Salmi 16:11).
Ix-xenqa ta’ qalbna tkun twettqet meta għajjatna, “Ħaġa waħda xtaqt mingħand il-Mulej, u nibqa’ nfittixha, li jien ngħammar f’dar il-Mulej il-jiem kollha ta’ ħajti, biex nitgħaxxaq bis-sbuħija tal-Mulej, u nimmedita fit-tempju tiegħu” (Salmi 27:4). Meta naraw lis-Sid wiċċ imb wiċċ, qlubna ma jkunu jridu xejn iżjed. “Min għandi fis-sema ħliefek? U m’hemm ħadd fl-art li nixtiequ ħliefek. Ġismi u qalbi ma jifilħux iżjed, iżda Alla qawwet qalbi, u sehmi għal dejjem” (Salmi 73:25-26).
Talba: “O li jasal dak il-jum, Mulej, illi b’feliċità ineffabbli qlubna u leħinna jingħaqdu mal-mifdija minn kull ġenerazzjoni u mal-eżerċti setgħan tas-sema u ngħannulek, ‘Qaddis, qaddis, qaddis, hu l-Mulej Alla, l-Omnipotenti, dak li kien, u dak li hu, u dak li ġej!’ X’antiċipazzjoni ħelwa! Preparani totalment u f’kull sens għal din l-okkażżjoni indeskrivibbli!”
Comments