“Il-ħsibijiet tal-qalb huma tal-bniedem, iżda t-tweġiba tal-ilsien mingħand il-Mulej. Qalb il-bniedem taħseb fi triqtu, iżda l-Mulej imexxilu riġlejh. Ix-xorti tintefa’ fil-ħoġor, iżda min jaqta’ kollox hu l-Mulej. Ix-xorti twaqqaf il-ġlied u tiddeċiedi bejn is-setgħana. Ħafna ħsibijiet hemm f’qalb il-bniedem, iżda hi l-fehma tal-Mulej li sseħħ. Il-passi tal-bniedem jidderigihom il-Mulej; kif mela l-bniedem jista’ jifhem x’għandu jgħaddi mingħalih? Qalb is-sultan f’id il-Mulej bħax-xmajjar tal-ilma; kull fejn jogħġbu jdawwarha” (Proverbji 16:1,9,33; 18:18; 19:21; 20:24; 21:1).
Sikwit nisimgħu u saħansitra aħna stess ngħidu diskors bħal dan li ġej: “Ara x’kumbinazzjoni kelli niltaqa’ miegħek!” Jew, “Kont nippassiġġa u nzerta rajt aċċident stradali.” Jew, “X’żinn dak, konna qegħdin nilagħbu u d-dada ġietni l-istess numru għal erba’ darbiet wara xulxin.” Inkunu qed nammettu li m’għandna ebda kontroll fuq ħafna ċirkostanzi, sempliċement ngħaddu minnhom mingħajr ma niddeċiedu xejn minn qabel. Il-vista tagħna qasira u ma narawx ’il bogħod. Għaldaqstant nibqgħu mbellha meta dak li qatt ma konna nippretendu jseħħ quddiem għajnejna. Ħwejjeġ tant misterjużi, illi nwaħħlu fix-xorti, jew fortuna.
L-Iskrittura turina minn verament jieħu kull deċiżjoni li għalik tidher remota jew mhix importanti. “Ix-xorti tintefa’ fil-ħoġor, iżda min jaqta’ kollox hu l-Mulej.” Huwa l-Mulej, Sid is-sema u l-art, illi jidderieġi kollox, anke l-irqaqat u dettalji li għalik jidhru fortuwiti, bla skop ta’ xejn. Għall-Mulej m’hemm xejn li ma jikkontrollahx, bħallikieku lil hinn mit-treġija tiegħu. Iva, anke d-dada tal-logħob, tiġi fuq in-numru ħamsa jew tnejn jew sitta għax tkun id-deċiżjoni tiegħu. Għerf bħal dan hu għoli wisq għalina, u ma nistgħux inlaħħqu miegħu. B’daqshekk ma jfissirx li ma nistgħux niggwadanjaw minn dal-fatt meraviljuż.
Għal min jemmen, il-Kelma divina hi biżżejjed. Allura jekk Alla jikkontrolla kull deċiżjoni, importanti jew le, ma taħsibx li għandek tafdah f’kull deċiżjoni li int kostrett tieħu? Jekk sempliċi werqa ma taqax wiċċha ’l isfel jekk ikun qatagħha li taqa’ wiċċha ’l fuq, għaliex m’għandikx tistrieħ fih u temmen li ebda ħsara ma tiġrilek jekk ma tkunx id-deċiżjoni tiegħu hekk? Il-Mulej ma ċediex il-gvern tiegħu; serraħ qalbek fih. Inħeba fih. Tgħallem sib rifuġju fih bħala l-fortizza u s-sur sħiħ li qatt ma jċedi.
“Ix-xorti tintefa’ fil-ħoġor, iżda min jaqta’ kollox hu l-Mulej.” Mela issa li temmen dan, idra għid, “Il-Mulej iberikkom!” u mhux, “Good luck” lill-istudenti deħlin għall-eżami, jew lill-koppja għadha kemm tiżżewweġ. U lil min qed igawdi r-risq, għidlu, “Ħa jkompli miegħek il-Mulej!” u mhux, “Kemm int iffortunat!” Għax, “ix-xorti tintefa’ fil-ħoġor, iżda min jaqta’ kollox hu l-Mulej.”
Talba: “Missierna smewwieti, jekk lanqas għasfur tal-bejt ma jaqax mal-art mingħajr ir-rieda tiegħek, kemm għandu jkollna fiduċja fik! Int taħkem minn fuq it-tron sovran tiegħek, u m’hemm xejn li jista’ jżommlok idek jew jistaqsik x’int tagħmel. Għaldaqstant aħna nfaħħruk; aħbina fik, ipproteġina u ħarisna.”
Comments