Viżjoni jew Vojtaġni

“Tafu kif m’eżitajt xejn milli niddikjaralkom kwalunkwe ħaġa profitabbli u għallimtkom pubblikament u minn dar għal dar, nixhed solennement kemm lil-Lhud kif ukoll lill-Griegi l-indiema lejn Alla u fidi f’Sidna Ġesù. U issa, imġiegħel mill-Ispirtu, jien sejjer lejn Ġerusalemm bla ma naf il-ħwejjeġ li se jiġruli hemmhekk, ħlief illi l-Ispirtu s-Santu f’kull belt jixhidli solennement billi jgħid illi ktajjen u tribulazzjonijiet jistennewni. Iżda ħajti nikkonsidraha valur ta’ xejn, bħala mhix prezzjuża għalija nnifsi, imbasta ntemm il-korsa tiegħi u nwettaq is-servizz li rċevejt mingħand is-Sid Ġesù – il-kompitu li nixhed solennement għall-evanġelju tal-grazzja t’Alla” (Atti 20:20-24).

Ħa jkun l-għan tiegħek il-konfidenza kwieta li, anke jekk qatt ma twarrab mit-territorju tiegħek, tkun għext kompletament. Imbasta tkun għaraft il-vija mfassla għalik. Meta tgħix mingħajr il-pjan t’Alla għal ħajtek tkun qisek qed tħit b’labra mingħajr ħajt, jew tikteb l-awtobijografija b’pinna bla linka.

Imqar Freud, li xejn ma kien simpatetiku mal-fidi Kristjana, jgħid li “r-reliġjon biss kapaċi twieġeb il-mistoqsija dwar l-għan fil-ħajja. Wieħed bilkemm jista’ jiżbalja meta jikkonkludi li l-idea ta’ għan fil-ħajja tiddependi fl-intier tagħha fuq is-sistema reliġjuża.”

Appuntu Andrè Maurois, biċ-ċaħda tiegħu ta’ kwalunkwe reliġjon, jasal biex jgħid: “L-univers huwa indifferenti. Min ħalqu? Għala ninsabu hawn fuq dal-gods żgħir tat-tajn, nagħqdu fl-ispazju infinit? M’għandix l-iċken ħjiel, u ninsab konvint li ebda ħadd ieħor m’għandu l-iċken idea.”

Hekk, mela, l-ikbar impatt possibbli li l-miskredent jista’ jħalli fuq l-eternità hu simili għall-impatt li jħalli bastiment fuq l-oċean. Mal-pruwa tiegħu jħalli t-tranja, impressjonanti għal ftit waqtiet, imma wara minuta ma jibqa’ ebda traċċa tagħha.

Minn dan li għidt s’issa, ma jibqagħli ebda dubju li neħtieġ il-viżjoni, mhux sempliċement kwalunkwe viżjoni, imma l-aqwa u l-aħjar viżjoni, dik supereċċellenti. Il-kittieb sagru jafferma: “Fejn m’hemmx viżjoni, il-poplu jkun bla lġiem, iżda min iħares il-liġi hu mbierek” (Proverbji 29:18).

Ċerta knisja Amerikana stqarret: “Il-viżjoni tagħna sforzatna biex naħsbu aktar bħala missjonarji milli bħala konsumaturi.” Viżjoni tintlaqa’ biss fil-proporzjon kemm tabilħaqq tikkorrispondi mas-sens mhux espress tal-għan tagħna lkoll. Dixxeriment ta’ mument kultant jiswa daqs esperjenza t’għomor sħiħ. Il-viżjoni hi l-bżonn l-aktar urġenti tad-dinja. M’hemm ebda sitwazzjoni bla tama; hemm biss nies li jaħsbu bla tama.

Talba: “Mulej, inti pronunzjajtna mbierka għax għajnejna jaraw u widnejna jisimgħu. Wassaltilna messaġġ mimli tama, u żejjintna b’viżjoni li tieħu lil hinn mill-qabar. Ħalli d-dawl tal-vanġelu jilluminalna ħajjitna f’kull aspett tagħha, biex minn hawn stess nippjanaw u naġixxu skont il-pjan tiegħek kif urejtulna fil-paġna tal-Iskrittura Mqaddsa.”