“F’kull taħbit hemm il-qliegħ, iżda fit-tlablib hemm l-għaks. Kun af tajjeb kif inhuma l-għanem tiegħek, u ħu ħsieb l-imrieħel tiegħek. Għax l-għana ma jibqax għal dejjem, u lanqas kuruna ma ddum minn nisel għal nisel. Meta jinħasad il-ħaxix, jidher l-inbiet, u jinġema’ l-ħuxlief tal-muntanji. Il-ħrief jagħtuk l-ilbies u l-bdabad jagħtuk b’kemm tiswa għalqa. U int ikollok ħalib tal-mogħoż biżżejjed għall-ikel tiegħek, għall-ikel ta’ nies darek, u għall-ħajja tax-xbejbiet tiegħek. Min jgħasses it-tina jiekol il-frott tagħha; hekk min jgħasses lil sidu jitweġġaħ” (Proverbji 14:23-27; 27:18).
Mela darba kien hemm ċorma ġrieden, li ltaqgħu flimkien biex jiftiehmu bejniethom kif se jeħilsu mill-qattus kiefer. Wara strappata diskors, qabeż ġurdien u qal: “Norbtulu ġolġol m’għonqu. Hekk meta jkun ġej, nisimgħu l-ħoss u naħarbu minnufih.” Kulħadd feraħ b’idea tant stupenda, sakemm ġurdien xiħ, qiegħed jissamma’ mir-rokna, interviena u qal: “Min se jmur jorbot il-ġolġol m’għonq il-qattus?” Għal dan il-kliem, kulħadd tbikkem u għalaq ħalqu. Ħadd ma kien lest jissogra ħajtu u jdendel il-ġolġol m’għonq il-qattus.
Din il-ħrafa smajnieha fuq il-bank tal-iskola; tpinġi quddiemna l-verità mgħallma f’dan il-proverbju: “F’kull taħbit hemm il-qliegħ, iżda fit-tlablib kemm l-għaks.” Paroli fil-vojt ma jiswa għal xejn ħlief biex titlef il-ħin. Ix-xogħol ma jsirx bit-tlablib; il-produzzjoni tibqa’ nill bit-tħaddim tal-ilsien. Kemm hu aħjar, minflok tparla u ttaqtaq u tredden, tagħmel xi ħaġa għall-ġid!
X’int tagħmel fil-prattika biex tagħti sehmek fil-bini tal-knisja ta’ Kristu? Toqgħodx tilmenta li qajla tista’ tagħmel bravuri. Ibda fuq livell baxx, mnejn jibda kulħadd. Għasfur jista’ jaqbad f’munqaru żerriegħa ċkejkna u jtir biha fuq gżira mbiegħda. Hemm iż-żerriegħa tisponta, u tirriproduċi lilha nfisha sakemm eventwalment il-gżira tinkesa bil-fjuri, u tkun konvertita f’pajsaġġ il-ġmiel tiegħu, mimli għaxqa.
Meta l-agrikulturisti barranin jiddeċiedu li jaqilbu art mogħxa f’mergħa, jagħmlu dan bi prattika msejħa inokulazzjoni, ċoè, ideffsu biċċiet tat-terf fil-ħamrija f’distanzi minn xulxin, u minn dawn iċ-ċentri l-ħaxix jikber u gradatament jestendi f’kull direzzjoni, sakemm il-medda kollha tinkesa bil-ħaxix. Hekk ukoll il-Kristjan, bl-isforzi tiegħu biex jagħmel is-sewwa, jista’ inkonxjament jinfluwenza lil ħaddieħor f’taħbit simili; u huma, daparti tagħhom, jispiraw aktar imħuħ. Minn żerriegħa umli depożitata f’qalb dixxiplu umli, jista’ jikber frott innumerabbli u fjuri ta’ grazzja li jimlew u jżejnu l-knisja t’Alla.
Imqar Seneka, l-Istojku, jirraġuna sensibbilment meta jgħid, “Min jagħmel il-ġid lil ħaddieħor jagħmel il-ġid ukoll lilu nnifsu, mhux biss fil-konsegwenzi, imma fl-att innifsu; għax il-kuxjenza hienja tal-benefattur tkun premju adegwat.”
Talba: “Missierna fis-smewwiet, il-poplu tiegħek ftit li xejn jeħtieġ kumitati u diskussjonijiet. Wisq anqas għandu bżonn tqasqis, tgergir u ilmentar minn nies li biex ireċplu famużi iżda biex jerfgħu driegħ favur is-sewwa, ikun miraklu. Il-poplu mifdi tal-Mulej jeħtieġ ħaddiema li jgħidu ftit u jaħdmu ħafna. Sawwar minna dat-tip ta’ nies, imħeġġa għall-opri t-tajba, ħabbara tas-sewwa, rikki fl-imħabba reċiproka, u lesti dejjem nestendu lilna nfusna lejn il-mitlufa. F’ġieħ Ibnek, ammen.”
Comments